Shillong, Jylliew 27
U President rangbah jong ka Hynñiewtrep National Youth Front (HNYF) bad uba dei ruh u ksiang jong ka Hynñiewtrep National Liberation Council (HNLC) ban ïakren ïasuk hapdeng ka HNLC, ka Sorkar Jylla bad ka Sorkar Pdeng, u Bah Sadon Blah u la shah khot hajir ha ka shlem treikam jong u Superintendent of Police (SP) ka East Khasi Hills District ha kaba ïadei bad ka jingshah kem jong kiba bun ki dkhot jong ka HNYF kiba la shah kynnoh donkti dawa pisa bad pynbthei bom IED ha Them Ïew Mawlong.
Kitei ki dkhot ka HNYF kiba la shah kem ki kynthup ïa u Bah Tarson Lymba uba dei u Disciplinary Secretary, u Bah Barnabas Lyngdoh bad uwei uba ju khot ieid da u Bah Bah Dympep.
Haba ïoh ban ïakren bad U Nongsaiñ Hima ha ka Sngi Palei hadien ka jingshah khot hajir, u Bah Sadon Blah u la ong ba ka jingshah khot ka jong u ka dei beit thik halor ka jingtohkit ïa kitei ki dkhot ka HNYF kiba la shah kynnoh ba ki la donkti ban leh ïa ki katto-katne ki kam beaiñ.
U Bah Sadon u la ong ruh ba kum u ksiang ka HNLC, na ka liang ki pulit ki la tohkit ruh ïa u ha kaba ïadei bad ka jingshah kem u Bah Storgy Lyngdoh uba dei u Personal Security Officer (PSO) jong u Vice-Chairman ka HNLC, u Bah Manbhalang Jyrwa.
U Bah Sadon u la ong ruh ba ha katei ka jingtohkit, na ka liang ki pulit ki la dep ban kylli lut baroh ki jingkylli kiba donkam bad u la ong ba lehse um tharai shuh ba ka tnad pulit kan dang ïai khot hajir ïa u.
“Kaei kaba ki kwah ban kylli ki lah kylli lut, ngam tharai ba kin donkam ban khot kylli biang”, la ong u Bah Sadon.
Shuh shuh u Bah Sadon u la ïathuh ruh ba katkum ka jingïoh jingtip jong u, ka tnad pulit ka la khot ïa kiba bun kiba don bynta ha kane ka kam naduh ki bahaïing bahasem, ki paralok parajor bad kiwei-kiwei kiba don ka jingïajan bad kitei kiba la shah kem.
Haba kylli halor ka jinglong-jingman katkum ka jingbishar bad ka jingtohkit ïa kitei ki dkhot ka HNYF kiba la shah kem, u Bah Sadon u la ïathuh ba u Bah Tarzon Lymba u la ïoh jamin na ka ïingbishar ha ka 25 tarik u bnai Jylliew 2024 hynrei ki la rah biang pat ïa u sha Nongpoh ban pynlong ïa ka jingtohkit katba uwei pat u dang shu dep ïa ka Police Custody ha kine ki khyndiat sngi.
Kum ban shu kdew hangne u Bah Barnabas u la shah kem halor ka jingshah kynnoh ba u la donkti ha ka jingdawa pisa katba u Bah Tarzon pat u la shah kem halor ka jingdonkti ban kawang bom IED ha Them Ïew Mawlong.
