Jowai, Jylliew 27
U District Magistrate jong ka West Jaiñtia Hills u la pynmih ïa ka hukum hapoh ka Section 144 CrPC kaba khang pyrshah ban khlong shyiap, tih maw ha ka wah Myntdu bad harud jong ka.
Ïa kane ka hukum la pynmih namar la lap ba ka wah Myntdu ka la shah ktah bad kylla ktieh namar ki wahduid kiba tuid sha ka, ki rong ïa ki jakhlia bad kaba la pynlong ruh ïa ka wah ban julor bad ktah ruh ïa ka rukom sam umbam umdih sha ki thliew ïing jong ki nongshong shnong ka sor Jowai.
Kane ka hukum ka khang pyrshah ruh ban saitjaiñ, sait-kali bad ruh ban bret ïa kino-kino ki jakhlia sha ka wah Myntdu bad ruh ban pyntuid ïa ki jakhlia kiba mih na ka jingshna ïing shna surok.
La khang ruh ban bret ïa ki jingsong kynthup ki jingsong khyllung ne diapers bad sanitary pads sha ka wah.
