Jowai, Jylliew 27
Ka lehniam Behdien-khlam ba saw sngi lynter kaba ju pynlong shisien shisnem da ki jaidbynriew Pnar ba dang bat ïa ka niam tynrai (Niamtre) kan sdang ha ka 30 tarik Jylliew haduh 3 tarik Naitung.
Ïa kane la pynbna da u President ka Seiñraij Jowai u Bah Hercules Toi bad u Dolloi ka Elaka Jowai u Bah Puramon Kynjing ha ka jingdonlang u Vice President Seiñraij Jowai Bah EMH Passah, Assistant General Secretary Seiñraij Jowai Bah Wyr-ai-ki Kharbuki haba ïakren bad ki lad pathai khubor ha ophis ka Seiñraij Jowai ha ka 27 tarik Jylliew.
U President u la pyntip ba ha ka 3 tarik Naitung kaba dei ka sngi khatduh jong ka shad Behdienkhlam, yn wan ban sakhi da u Myntri Rangbah ka Jylla u Conrad K Sangma kumjuh ki Myntri ka Sorkar Jylla nalor kiwei kiwei ki kynrem ki lyndan.
U Bah Hercules Toi u la khot sngewbha ïa baroh ki paidbah sha ka jinglehkmen Shad Behdienkhlam na bynta ban ïoh ka jingkyrkhu, ka jingkoit jingkhiah, ka roi ka par, ka jingdap jingbiang, ka jingkiew ha ka kamai kajih, ka pule puthi bad ki jingkyrkhu ha ki liang baroh.
U Dolloi Bah Puramon Kynjing u la ong ka Behdienkhlam hapoh ka Raij Jowai ka dei kawei na ki jinglehniam kaba la pyndep halor ka nongrim ban lehkhmen bad shad sngewbha bad katkum ki hukum jong u Trekirot ka long ban burom ïa ka jingkyrkhu kiba la ïoh na ka mariang kumjuh ki blei shnong blei thaw kiba sumar sukher ïa ki nongshong shnong.
Naka bynta ki jaka pynïeng kali jong ki VIP ha ka sngi khatduh jong ka Behdienkhlam la pynkhreh ha Chilliang Raij Community Hall, madan Tpep Pale, ha phyllaw ka skul Seiñraij, kumjuh ki jaka pynïeng kali ha Iawmusiang bad ha madan Jerusalein.
U Vice President ka Seiñraij Jowai Bah EMH Passah u la kyntu ïa baroh ki nongshong shnong ka Jowai ban wanrah ka jingkhuid jingsuba bad ba ki briew kiba nabar kin ïohi ïa ka jinglong khuid ka sor Jowai haba ki wan ban sakhi ïa ka Behdienkhlam.
