Nongstoiñ, Jylliew:
Ka District Social Welfare, Nongstoiñ ha ryngkat ka jingïatreilang bad ka Urban Mission jong ka New Nongstoiñ Presbyterian Church, ha ka Sngi Balang ki la rakhe ïa ka sngi pyrshah jong ka jingpyndonkam drok ha shi tyllup ka pyrthei ne ka International Day Against Drug Abuse & Illicit Trafficking halor ka phang “The Evidence is Clear: Invest in Prevention” da kaba pynlong ïa ki prokram kiba pher bad ban wer bad kyntu ïa ka jingtreilang jong baroh ban rat dyngkhong ïa u drok.
La sdang ïa kane ka sngi da ka rally pyrshah drok, kaba la sdang na Indoor Sports Stadium sha Nongstoiñ Market Complex, ha kaba la ïashim bynta da ki khynnah skul, nonghikai, ki nongtrei ka DSWO bad ki kynhun kiba pher.
Ha kane ka sngi, u Bah Gabriel Wahlang, MLA ka Nongstoiñ u la long u kongsan ha ka jingdon ryngkatlang jong ka Kong D Pakynteiñ DSWO, Dr. P Lyngkhoi, Bah AH Malai, kiwei ki riewpawkhmat, ki nonghikai, ki nongtrei ka Thio Rehabilitation, Lawumshing bad kiwei kiwei.
U Bah Gabriel haba kren kum u kongsan u la kyntu ïa baroh khamtam ïa ki khynnah kiba dang khie samla ba kim dei ban wad jingtip shaphang u drok, namar lada bakla ki la ngat ha ka shrip jong u, bad ka la eh ba kin lait na jingriam jong une u jingdih kynsha bad u la kyntu ïa baroh ban jied ïa ka jingim ym ïa u drok.
Ïa kane ka juh ka prokram la pynlong ruh ha Nongstoiñ College da ka ophis jong ka DMHO Nongstoiñ, bad ha Mawshynrut Block da ka District Legal Services Authority, West Khasi Hills, District ha ophis BDO.
Ka jingthmu bad ka khubor kaba la ïoh na kine ki ar tylli ki prokram ruh ka long kaba shai kata ban rat dyngkhong ïa u drok bad ban kyntu ïa baroh ban kiar rai kut rai dam na une u jingdih kynsha bad ha kajuh ka por ban kyntu ïa kito kiba la kyrni ha une u jingdih ba kin iehnoh shi syndon bad im biang ïa ka jingim kaba thymmai na ka bynta ka suk ka sain ha ka imlang ka sahlang.
Kumjuh ruh ïa kane ka sngi la rakhe ha Mairang ha Eastern West Khasi Hills District.
Ïa ka prokram la pynïaid da ka ophis jong ka District Legal Services Authority, West Khasi Hills District, Nongstoiñ ba la pynlong ha Mairang Presbyterian Science College halor ka phang “The Evidence is clear Invest in Prevention” kaba mut shwa ban jia kiei kiei ngin hap ïada lypa.
La ïoh jingkren lyngkot na u Principal jong ka Mairang Presbyterian Science College Bah R Thangkiew bad u la ai ka jingkhublei kyrpang ïa ka District Legal Services Authority, West Khasi Hills District ba ka la wanrah ïa kum kine ki jait jingpynshai bad kaba ai jinghikai ruh ïa ki khynnah kolej ha kaba ïadei bad ka jingsniew jong u drok.
Ka Kong GL Mawphlang (LAC) kaba long ruh ka resource person ha kane ka prokram ka la batai shaphang ka NALSA Scheme 2015 kaba ai jingïarap ban pynlong ïa ki jingai jinghikai lane ki prokram ban ïarap ïa kito kiba la kyrni ha u drok bad ban tehlakam ïa ki nongdih bad ki nongdie bad ka la batai ruh shaphang ka POSCO Act ba kino kino kiba ktah kti ïa ka longrynïeng jong u ne ka khynnah kiba hapoh 18 snem rta kin hap ha ka aiñ POSCO bad ba kin hap ruh ha ka jingshah pynshitom katkum ki kyndon aiñ bad lah ruh ban shah set patok shirta jingim.
