Washington, Jylliew:
Kawei ka samla 18 snem na United States, ka la shah bat noh ha ki bor pyniaid hadien ba ka la phone sha u nombar 911 jong ki pulit US tang ban kiar bad lait na ka jing-iakynduh jong ka bad uwei u briew uba ka shu ia ithuh online.
Na ka liang ki pulit ki la pynpaw ia ka kyrteng jong kane ka samla kaba la ithuh kum ka Sumaya Thomas, ia kaba la shah kem noh ha ki pulit hadien ba ki pulit ki la iathuh ba katei ka samla ka phone ban pan jingiarap namar ba u briew uba ka don jing-iadei la 2 snem u don habar ka iing sah jong ka, bad u phah ruh ia ki message byrngem ba har rukom haduh ba u la byrngem ruh ban shoh bad ban pyniap ia ka lada u ioh.
Kumta, ki pulit ki la kem noh ruh ia utei u briew uba la ithuh kum u Thomas bad dei ha ka 16 tarik jong u Jylliew ba ki pulit ki la ioh ban kem noh ia u. Katei ka samla 18 snem ka la phla ruh ha ki pulit ba ka la armet bad pun khun na utei u briew uba ka la ia ithuh online bad don jing-iadei ruh kumba 2 snem.
Hynrei ha kawei pat ka liang, la ong haba ki pulit ki la tohkit bniah halor ka jingiadei jong u bad katei ka samla, utei u briew u la ong ba u dang shu sdang ban iakren bad ka dang kumba shitaiew shwa jong kane jingjia bad u la pyni ruh ia ki message kiba u la iakren bad phah sha u nombar uba dei jong katei ka samla.
Ki pulit ki la bat ia u haduh kumba shi kynta eiei ban tohkit bniah halor kitei kiei- kiei baroh kiba la kynnoh da katei ka samla. Hynrei hadien ba la tohkit bniah sa ia katei ka samla, ka Ms. Thomas ka la phla ba baroh kitei ki long tang ki jingkynnoh jong ka namar ba kam kwah ban leit iakynduh shisha ia utei u briew uba ka la iakren bad ia ithuh lyngba jong katei ka App ia wad shyieng krung ‘Dating App’.
Hynrei, katei ka samla ka la iathuh ba ka dang pyrkhat ba ki pulit kin ym leit shisha watla ki la ioh ia ka phone jongka ha katei ka por. Katba, kam shym poi pyrkhat ba kin leit poi shisha ban iarap bad kem ia utei u briew uba ka la shu kynnoh bad pharep be-aiñ tang namar ba kam kwah ban leit kynduh ia u.
Ia katei ka samla pat ki pulit ki dang kem ha kane ka taiew ba la lah bad hadien kata la pyllait noh ia ka na ka patok ba la set ia ka hapoh Johnson County Jail kaba don hapoh Iowa.
