Shillong, Jylliew 28
Ka Director General of Police (DGP) ka Jylla, Kong Idashisha Nongrang ha ka Sngi Thohdieng ka la ong ba 65% na ki mukotduma kiba la dep ban mudui ha u snem ba la dep ki dei halor ki kam thombor pyrshah ïa ki kynthei bad ki khynnah.
“Nga kwah ban kdew hangne ba lada poi sha ka bynta ba ïadei bad ki kam thombor pyrshah ki kynthei bad ki khynnah, 65% jong ki mukotduma kiba la dep mudui khamtam ha u 2023, ki dei na ki mukotduma halor ki kam thombor pyrshah ki kynthei bad khynnah,” la ong ka Kong Nongrang haba kren sha ki lad pathai khubor hadien ka jingïalang jong ki heh pulit ha ryngkat ka jingdonlang u Myntri Rang-bah ka Jylla, u Conrad K. Sangma bad Symbud Myntri Rangbah ka Jylla, Bah Prestone Tynsong.
Haba kubur ba ki kam thombor pyrshah ki kynthei bad khynnah ka la kiew, ka la ong ba lada phai sha baroh ki jingjia kiba la jia hapoh ka Jylla ha u snem ba la dep – ka long 32% (jingshah thombor ki kynthei bad khynnah) bad kane ka long kaei-kaei kaba hap ban pyrkhat bad shimkhia.
Haba phai sha ka ‘Cyber Crime’, ka DGP ka la ong ba ka tnad ka la kyrpad ïa ka jingtyrwa sha ka Sorkar na bynta ka ‘Cyber Wing’ bad u Myntri Rangbah lem bad u Symbud Myntri Rangbah ki la pynsngew ban ïaid shakhmat bad katei ka kam.
“Kane ka long kawei ka kam kaba ngin pynleit jingmut bad kane kan sa urlong noh shen,” ka la ong.
Haba kren halor ka jingïalang, ka Kong Nongrang ka la ong ba ïa kane ka jingïalang la ju pynlong man u snem (wat la ym shym la pynlong ha u snem ba la dep), bad ha kane ka kynti, u Myntri Rangbah lem bad u Symbud Myntri Rangbah ki la kular ban don lang ha syndah bad ai ka jingkyrshan ïa ka tnad ha ka jingtreikam jong ka.
“Ki mat kiba hakhmat eh ba ngin ïakren ki long kumba ju long – ban tehlakam bad thwet ïa ki kam sniew, ban khmih ïa ki jingdon jingem ba ngi don, bad ban pynjanai ïa ka jingïadei hapdeng ki paidbah bad ki pulit,” ka la ong.
Katei ka heh pulit ka la ïathuh ruh ba shen yn sa thung noh ïa u PRO jong ka tnad.
Ha kajuh ka por, ka la ong ba ka tnad ka ïatreilang bad ka tnad Social Welfare halor ka projek Drug Reduction Elimination & Action Mission (DREAM).
“Kane kan ym dei tang ka jingpyrshang, hynrei nga kwah kdew hangne ba ha ka jingïalang ba khatduh kaba la long ha u 2022, la shim ïa katto-katne ki sienjam bad ka Sorkar ka la kyrshan ïa ngi bad ngi la lah ban pyntreikam ïa kiba bun ki kam bad kam shym la kut tang ha ka miej ïakren,” ka la ong.
Shuh shuh ka DGP ka la bynrap ba kawei na ki jingthmu ba hakhmat jong ka jingïalang ka long ban khmih bniah halor ka rukom treikam jong ka tnad pulit ha ki distrik bapher-bapher.
