Shillong, Jylliew 28
Uwei u nongkhaïi drok u la lait phet na ka kti ki nongkitkam shnong Mawkhar najan Ri Khasi Press bad ar ngut kiwei pat ki la shah bat noh namar ka jingwan die drok ha Mawkhar hajan Khasi National Dorbar Hall ha ka Sngi Thohdieng.
Une u nongkhaïi drok u la lait phet na Mawkhar da kaba phet da ka scooty kaba u ñiah katba ar ngut kiwei ki samla shynrang ki la shah bat ha ki nongkitkam shnong.
Katkum ka jingphla jong kine kiba die drok ki la ïathuh ba ki la sdang ïa kane ka kam ban dih bad ban die mynta la lai snem.
Ki la ïathuh ba ki dei tang ki nongdie bad ïa ka bai ïohnong kaba long san spah tyngka shi sngi ki pyndonkam ban dih ïa u drok namar lada kim ïoh ban dih kim nang ïohthiah, kim nang ban treikam ruh.
Haba ïakren bad u Rangbah Shnong Mawkhar, Bah Arwansing Tariang u la ïathuh ba ïa kine ki samla ba die drok la aiti noh sha ki pulit.
U la ïathuh ba ka jingjur ka jingïadie ïa u drok ka dei ha Motphran hynrei ha Mawkhar ka dang duna tangba kum ka shnong ka la hap ban pyrkhing bha.
“Ngi la lap mynshwa ïa uba dih drok hynrei ngi la beh shnong bad mynta ngi la maham lypa ïa kino-kino kiba dih drok ngin ai da kaba tyngeh” u la ong.
U la pyntip ruh ba ka shnong kan ai sha ki pulit bad ki bahaïing bahasem ki dei ban phah sha jaka sumar ïa kine kiba kyrni dih drok.
Nalor kata, u la pynpaw ka jingbynñiaw ïa ka jingjyllei kiba dih drok ha Shillong hynrei ka shnong ka la peit pyrman ïoh don kiba wan rung shapoh ka shnong.
