Shillong, Jylliew 28
Ka jingïakhun pre-quarter final kan sdang naduh ka sngi Saitjaiñ ha kaba ka Switzerland kan ïakhun pyrshah ïa ka lahduh saw snem mynshwa ka Italy ha Berlin, katba ka Germany ïa ka Denmark ha Dortmund.
Hadien ka jinglah ban ïalehkai bha da ki kynhun kum ka Germany bad ka Spain, kiba bun ki la phai khmat sha kine ki kynhun ba ki lah ban pynurlong na ka bynta ban rah ïa ka trophy nam lahduh ha ka Euros 2024.
Na ka liang uwei na ki khlur ïalehkai barim ka ri u Bhaichung Bhutia u don jingkyrmen ba ka Germany kan hap ban pynurlong hadien ba ka la ïoh rung sha ka pre-quarter final. “Nga sngew ban ong ba ka Germany ka lah ban thaw ïa ka khana pateng kumba ka Real Madrid ka la lah ban pynurlong ha ka Champions League. Ki lah ban long kumjuh ïa ka Germany, Spain bad ka Italy namar ki la lah ban ïalehkai bha ha jingïalehkai ba la dep. Ka Germany ka long kawei na ki kynhun kaba don jingkyrmen bad kaba long ka kynhun kaba khlaiñ bor namar ka la lah ban ïalehkai bha ha ka jingïalehkai group,” la bynrap u Bhutia.
Shibun ki jingkylli shaphang u Kai Havertz bad ka jingïoh jaka hapoh ka kynhun ïalehkai jong ka Germany. Une u rangïalehkai shakhmat u la lah ban ïalehkai bha bad u la ïoh ban thep kol bad kumjuh ban ïarap pynbuh bol ha ka jingïalehkai kaba nyngkong. Nalor kine ki ar tylli ki jingnoh syn-ñiang, ki la don kiba la pynpaw ka jingiaroh sha-phang u Niclas Fullkrug hadien ba une u rangïa-lehkai shakhmat ka Dort-mund u la lah ban pynïakhaid kylla pyrshah ïa ka Switzerland na ka bynta ban wan ha ka kyrdan ba hakhlieh jong ka Group-A.
“Nga sngew ban ong ba lada ka kynhun ka lah ban ïalehkai bha, ym da donkam ban dangkylliang ïa ki rangïalehkai ha ka bynta kaba shakhmat. Ngi la ïohi ïa ka rukom ïalehkai u Kai Havertz, khamtam eh ki katto katne ki kol, hynrei kane kam da ktah than ïa ka kynhun. Nga tharai ba yn ym wanrah ka jingkylla hapoh ka kynhun namar ki la lah ban ïalehkai bha. Ka long kaba donkam ba un thep shi kol lane ar kol na ka bynta ka kynhun,” u la bynrap.
Ryngkat ka Germany, ka Spain ka la long ka kynhun kaba la lah ban ïalehkai bha ha kane ka lympung. Kane ka kynhun ka la sdang ïa kane ka lympung da ka jingjop kaba 3-0 kol ïa ka Croatia bad ka long tang kane ka kynhun kaba la khur jingjop ha baroh lai sien ki jingïakhun ha ka Group. Mynta kane ka kynhun kan ïakhun pyrshah ïa ka Georgia ha ka pre-quarter, katba ka Germany ïa ka Denmark. Lada ki lah ban phur ïa ka jingjop, ka Spain ka lah ban ïakynduh pyrshah ïa ka Germany ha ka quarter final.
“Nga sngew ban ong ba kine ki kynhun ki long kiba biang namar ki la kynthup lang ïa ki rangïalehkai ba dangkhynnah bad kiba la ju mlien ha kum kine ki lympung. U kapten ka Spain u Alvaro Morata u long u rangïalehkai ba kynsai, ha kaba ki don ruh ki rangïa-lehkai ba dangkhynnah kum u Yamal bad u Williams. Haduh mynta ka Spain ka dang long ka kynhun kaba kynsai namar ka long kaba biang ha ka jingdon ïa ki rangïalehkai kiba kynsai bad ka don jingkyrmen ban khur ïa ka nam jop ha kane ka kynti kaba mynta,” la byhnrap utei kapten barim jong ka ri.
