Shillong, Jylliew 28
Ka Khun Hynñiewtrep National Awakening Movement (KHNAM) jong ka State Youth Wing sa shisien ka la khie im biang hadien katto-katne snem ba ka la duh noh na ki daw ka jingmih ka kynrum-kynram bad ka ïapait-ïapra hapoh ka kynhun.
Ka jingkhie im biang jong ka KHNAM State Youth Wing ka la paw pyrthei biang ha ka 28 tarik u Jylliew hadien ba u President ba rangbah ka seng, u Bah Pyndapbor-thiaw Saibon u la ïoh ban pyntian smai ïa ki nongïalam bathymmai ki ban kit ban bah ïa ka lyngkor na ka bynta ka Ri bad ka Jaitbynriew.
Ïa ka jingïalang pyntian smai ïa ki nongkitkam na ka bynta ka samoi treikam jong u snem 2024-26 la pynlong ha Khasi National Dorbar Hall Mawkhar, ha kaba la ïadonlang Working President, Bah Thomas Passah, General Secretary, Bah James A Neng lem bad kiwei-kiwei.
Ki nongkitkam bathymmai jong ka KHNAM State Youth Wing ki kynthup ïa u President, Bah Eric Swer, Working President cum Treasurer, Bah Pynshai Mawrie, Working President, Bah Joseph Pyngrope, General Secretary, Bah Wanbhabok Marweiñ, Assistant General Secretary, Bah Melambha Lyngdoh, Education Secretary, Bah Sylverson Umdor, Assistant Education Secretary, Bah Moris Efferson Sohtun, Sports Secretary, u Bah Kitbok Dkhar, Assistant Sports Secretary, Bah Lamshuwa Majaw, Agricultural Secretary, Bah Richard Nongbsap bad Bah Banpli Mawroh bad la thung Adviser ïa u Bah Thomas Passah. Haba ai jingkren ha katei ka sngi, u Bah Pyndapborthiaw Saibon u la ai mynsiem ïa ki nongkitkam jong ka State Youth Wing bad kyntu ruh ba kin trei shitom na ka bynta ban kyntiew ïa ka Ri bad ka Jaitbynriew.
U la ong ba kum ka Jaitbynriew ka donkam ban mih ki nongïalam ki ban ïalam ïa ka Jaitbynriew ban pynlaitluid na ka jingshah thombor ha kiwei pat.
“Ngi donkam ïa ki nongïalam kiba shisha bad ngi khmih lynti ba nangne shakhmat, da ka jingdon jong kine ki samla kin dang ïai mih shuh-shuh ki nongïalam ki ban ïalam ïa ngi sha ka lawei kaba phyrnai”, la ong u Bah Saiborn. Na ka liang u Bah Thomas Passah u la ong ba ki la don ki briew kiba la ong ïa u ba un ïakhun noh ïa ka ilekshon na kiwei-kiwei ki seng hynrei ka jubab kaba u Bah Thomas u la ai ha ki ka long ba u dang lah ba rem ïa ka ilekshon MDC hapoh ka jingïalam jong u Bah Pyndap Saiborn hynrei u dang ïoh ban trei laitluid kum u Working President jong ka KHNAM ban ïa kaba u jop ïa ka ilekshon na kiwei ki seng saiñ pyrthei kiba u shah teh bad um ïoh laitluid satia.
U Bah Thomas u la ong ba ka thong jong ka KHNAM kam dei tang ban jop ïa ka ilekshon hynrei ka thong ka dei ba kin trei.
“Ha ngi kam pat hun tang ban jop ïa ka ilekshon hynrei ynda ngi la treikam bad ngi la ïoh ban pyndep ïa la ka kamram jong ngi, kata keiñ ka ban pynhun ïa ngi”, la ong u Bah Passah.
Shuh shuh u Bah Thomas u la ong ba ka jingïakhun ïa ka ilekshon mynta ka long tang ban ïoh bor bad ban ïoh pisa hynrei kum kane ka jingpyrkhat ka long kaba sngewsih bha.
U la ong ba lada ka KHNAM ka ïoh ïa ka lad ban synshar hapoh ka KHADC, u la pyntikna ba hapoh shisnem, ki paidbah kin ïohi ïa ka District Council kaba pher.
“Lada ka KHNAM ha kane ka MDC ilekshon ka ban sa wan kan ïoh bat ïa ka bor synshar, ngan pyntikna ïa phi ba kan shimpor tang shisnem ba kane ka District Council kaba phi ïa tip mynta kan nym don shuh hynrei kan sa mih da kawei ka District Council kaba lehse, ka ban pynhun ïa kiba bun balang”, la ong u Bah Passah.
Kiba la ai jingkren ki kynthup ruh ïa u samla Eric Swer President ka KHNAM State Youth Wing bad u Bah James A Neng.
