Shillong, Jylliew 28
Ka Federation of Persons with Disabilities (FPD) ka la phah jingthoh sha u Myntri Rangbah ka Jylla, Conrad K. Sangma ban pynkynmaw sha u halor kiba bun ki jingeh ba ïakynduh hapoh ka Jylla ïa kaba ki la dep ban pynsngew la bunsien hynrei ki bym pat shym la pyntreikam da ka Sorkar haduh mynta.
Ka seng ka la kyrpad ïa ka Sorkar ban pynkiew ïa ka ‘Unemployment Allowance’ (UA) na bynta kiba duna dkhot met kiba la pyndep ïa ka klas X shaneng, na ka ?1500 sha ka ?3000 ha ka shi bnai khnang ba ki lah ban kyntiew ïa ka rukom im jong ki bad ban pyndap pynbiang ïa ki jingdonkam ba man ka sngi katkum ka Chapter V, Section 24 Clause-3 (h), jong ka RPWD Act, 2016.
Ka seng ka la ong ruh ba ki briew ba duna dkhot met hapoh ka Jylla kiba la thep kyrteng na bynta ka Chief Minister’s Social Assistance naduh u Kyllalyngkot, 2023 lyngba ka ophis Child Development Project Officer (CDPO) haduh mynta kim pat ïoh satia ïa ka jingmang.
Kumta, ka seng ka la kyrpad ïa ka Sorkar ban pyrkhat lem ban mynjur ïa ki nongthep kyrteng thymmai bad mang noh na bynta jong ki, naba dei tang kane ka jingïoh jong ki.
Na ka liang ka seng ka kwah ruh ba ki briew ba don jingduna dkhot met kiba trei kum ki ‘Muster Roll’ ha ki tnad treikam bapher-bapher ka Sorkar, ban pynskhem noh ïa ka kam jong ki hapoh jong ka thup kyrdan ‘Group-D’.
Shuh shuh ka FPD ka la bynrap ba ka katkum ka Chapter VI Section 33 (Clause i-iii) jong ka RPWD Act, 2016, ka Sorkar ka dei ban thung uwei u dkhot ha ka MPSC bad mar uwei-uwei ha baroh ki DSC ban khmih na bynta ka jingthep kam jong ki briew ba duna dkhot met.
Nalor kane, ka seng ka la kyrpad ruh ïa ka Sorkar ban pynithuh ïa ki kam na bynta ki briew ba duna dkhot met ha shuwa ban phah ïa ki jingpynbna sha ka MPSC bad DSC.
