Raphael Warjri
Ka jinglong briew shimet kaba khuid ba suba, ba hok ba shida barabor ka kyrsoi ïa ka mynsiem tiplem, kaba ri burom la ka longrynñieng, kaba tipbriew ban burom ïa kiwei, kaba tipblei ban ïaineh ha ka hok bad kaba kongsan tam ka long ba ka ai jinghun mynsiem bad ka suk ka saiñ ha lade shimet bad ha ka imlang sahlang. Kata ka dei ka spah kaba kordor tam ha pyrthei bad ka ban ïaineh ban sahnam barabor wat haduh ynda la khlad noh na ka pyrthei. Kat kata ka spah ba kynsai tam na baroh ki kynja spah khamtam ka spah pyrthei, hynrei ki briew ki dang khluh ban beh thong ïa ka spah pyrthei. Kaba kthong ïa ka spah pyrthei ka dei ka diengpyngkiang ban bam kruiñ ïa ka dohnud briew kaba dang tiplem, ba dang tipbriew, ba dang sngewsynei, ba dang ieit kylliang ïa la ki para briew, ba dang sbun ban sam lem ha ka imlang sahlang. Baroh ki briew na lade hi ki kyrsoi tang kaei kaei kaba bha suda, ba wat ki bymman ruh ki don ka jingsngew ban leh bha shwa tang ïa lade, hynrei da ka ba thmu ban pynsniew ïa kiwei. Kiba tuh ki thmu ban myntoi ïa lade ban dukha kiwei, kiba pyniap briew ki thmu ban im tang ïa lade ban duh noh ka mynsiem kiwei, kiba bishni pihuiñ ki sbun tang ïa lade bad khwan naphang sha lade ban kyrduh bad dukha kiwei wat haduh ba kin syrtok ka jingim. Kumjuh ruh kiba meng ba hangamei, ba khyllew ba kyreit ki rah skong tang ïalade da kaba thmu ban ibeiñ bad iuhroit ïa kiwei, lada iohlad wat ban thombor bor ruh kim salia tang ban kiew skong ïa lade.
Kine kiei kiei ki shu pyndukha mynsiem ha lade ban tuh noh ïa ka por bad ka bor ban trei bha bad leh bha ïa kiwei ha ka imlang sahlang bad lada kot ban khajoh na ka bynta ban shakri ïa ka longbriew manbriew. Kumta kito kiba shah kynnoh bymman ha kiwei ki dei ban puson ha la dohnud la kata kaba shah kynnoh ka long kaba shisha ne ba shu pharep. Ha la shimet dei ban kren ha la mynsiem lada ka jingthmu jong ka jingim ka dei ïa lade shwa ne ïa kiwei kiwei ha ka imlang sahlang. Khlem pep baroh dei ban phikir shwa ïa lade, hynrei ha ba phikir ïa lade ym dei pat ban long diengpyngkiang ïa kiwei. Lada jia ryngkhat ba ka thong ka dei kajuh bad kiwei pat, kaba donkam ban leh ka long ban duriap bad minot tang ïa ka kam lajong lada ka lah mo ban poi sha ka thong. Ka long kaei kaei kaba sep ei ban nujor bad kiwei ha kano kano ka liang jong ka kam ba la trei namar man la ki briew ha la shimet ki don la ka sap kyrpang shimet ban pynpaw hakhmat ka imlang sahlang. Ha ka jaka ban nujor ïa lade bad kiwei, dei ban synrop lang bad kita khnang ban kham khlaiñ shuh shuh bad kiew ryngkat ban ïa poi lang sha ka thong. Kum ka nuksa ha ka khaiï pateng lada don shilynter ki basa ba ïa die ïa ki juh ki mar, kawei ka basa ym dei ban peit matdong ïa kawei pat. Ki paidbah ba thied ki tip kumno ban jied ïa kaba bha tam katkum ka jingdonkam ha lade. Kaba donkam ka long ba manla kiba shong basa ki dei ban buh ïa ka mar ka ba bha, ban pynphuh pynphieng ïa ka basa bad ban khring ïa ki nongthied da ka khmat phuh samrkhie, khlem da pihuiñ ïa la ki paramarjan ba shong basa lang. Kane ka juh ka mynsiem sbun kan long ïa kino kino ki jait kam la da dei ha ka khaii pateng ne ha ka kam shakri ne ha kano kano ka kam tbit na la ka sap ttynrai lajong.
Ka thong jingjop ka dei ban khajoh lang, hynrei kino kino kiba kham tbit ki dei ban ioh kabu katkum la ka ka jingtbit, minot, duriap bad shitrhem ha la ka kam lajong. Kiba lah duh ha ka ba ïathong kim dei ban kiew irat tang marwei ba long sawkuna, hynrei ki dei ban kyntiew lang ia kiwei kiba kham hapoh jong ki ban ïa kiew lang sha kliar ka nam jop. Ha kata ka rukom ka don ka hok jong manla iwei-pa-iwei na ki kyrtong ban ïakhun tyngeh na ka bynta ban khajoh sha ka thong, ym da kaba shet kylla ïa kiwei, ym da kaba thok ba shukor, ym da kaba leh buittuh buitpoh, ym da kaba kynshoit ïa kiwei na ka bynta ban kiew ïa lade ne kino kino ki kam ban thombor ne iuhroit pyrshah ïa ka hok longbriew manbriew. Ka por ka dei kajuh na ka bynta baroh salonsar, hynrei ha ka janor briew ka ïaid stet na ka bynta kito kiba khluh bad trei smat bad ka suki na ka bynta kito kiba jaituh jaipdeh. Kumjuh ruh ka por ym dei ban sepei ha kaba suba sniew ia kiwei, ha ka ba pynjulor ïa kiwei, ha kaba bishni pihuiñ ïa kiwei, ha kaba pynïeng diengpyngkiang ïa kiwei na ka bynta ban jam suk ïa lade. Barabor ka hok ka ïeng rasong ha kaba kut bad lada don ki ba lehsniew ïa kiwei ban ioh khwan myntoi ïa lade, ka nong ka la ap lypa ha la ka pali ban kyrtoh kylla sha lade. Hynrei haba sbun ïa kiwei ka nong ka ba arshah laishah ka lah ban urlong ha ka jingim jong kita kiba kloi ban sam lem sha la ki parabriew ha ka imlang sahlang.
Tang kaba bha ka lah ban siew kylliang da kaba kham bha shuh shuh, bad ha kajuh ka rukom kaba sniew ka siew kylliang arshah laishah lada ym lah ban ïeng ha ka hok. Kaba kmen tohhoh ïa kaba myntoi shi khyllipmat ka lah ban pynjulor shilynter lada bam kruiñ ka mut ka pyrkhat ha lade na ka bynta ba rhah ban myntoi shimet. Kaba ïaishah ha kaba tuid suki suki ka nong jong ka jingmyntoi katkum la ka kamaram lajong ka don u soh u ba lah ban ai ka jinghun ka ba barabor bad kaba tngen shiryta haba kiei kiei baroh ki long kiba bha suda.
