Shillong, Jylliew 28
U National President ka NPP bad u Myntri Rangbah, u Conrad K Sangma, ha ka Sngi Thohdieng u la kyntait ba ka don ka jingïapait hapoh ka seng bad ha ka longïing-longsem ha kaba ïadei bad ka jingjied kyrtong na ka bynta ka ilekshon shiteng samoi na Gambegre.
Kan sa don ka ilekshon shiteng samoi na Gambegre hadien ba u Saleng A Sangma u la hap ban iehnoh ïa ka shuki MLA na ka daw ba u la shah jied kum u MP ka Tura na ka seng Congress.
“Kam don satia ka jingïapait hapoh ka seng ne ka jingïapra ha ka longïing-longsem,” la ong u Conrad haba kren sha ki lad pathai khubor.
Ki don ki khubor kiba ïathuh ba u hynmen jong u Conrad, u James PK Sangma, uba la kwah ban ïakhun na Gambegre, u la pynpaw ïa ka jingbym sngewtynnad halor ka jingthmu ban pynïakhun da ka kurim jong u Myntri Rangbah, ka Mehtab Chandee Agitok Sangma.
Haba kyntait ïa kane, u Conrad u la ong ba ki la don kumba 7 lane 8 tylli ki kyrteng kiba la ïaid ha kaba ïadei bad katei ka ilekshon, bad u la ïakynduh bad ïakren bad baroh kine.
“Dang ha ki khyndiat sngi, ka la don ka jingïakynduh bad baroh kiba kwah ban ïakhun bad kumjuh ruh bad kito kiba la paw kyrteng, hynrei kiba lah ruh ban dei ki bym kwah ban ïakhun ïa ka ilekshon. Ngi la ïakren lut bad baroh kiba la paw kyrteng bad ki la pynpaw ba ki don bad ka seng, bad kano-kano ka rai ba shim da ka seng kan dei kaba khatduh, bad kin burom ïa kata ka rai,” la ong u Conrad.
Namarkata, u la ong ba ka seng ka la dep ban shim ïa kawei ka rai, bad mynta ka dang ïaid ka jingshim kaiphod ha ka kyrdan jong ka konstitwensi, Block, District bad kiwei, bad hadien ba la pyndep ïa kata ka jingshim kaiphod, ka State Committee kan sa tyrwa ïa ki jingai jingmut.
“Ngan pynshai biang ba kam don satia kano-kano ka ïapait-ïapra. Ngi kren shai ba ngin ïatreilang kum ka longïing-longsem bad khamtam eh kum ka seng, bad baroh kito ki kyrteng kiba la mih kin ïatreilang ha kane ka ilekshon kaba donkam,” la ong u Conrad.
