Shillong, Jylliew 28
Ka Sorkar Jylla ka la kyrpad ïa ka tnat liengsuiñ jong ka Sorkar Pdeng ban pyntreikam ïa ka jingpynïaid liengsuiñ ar sien ha kaba kut taïew (weekend) na Umroi bad ban pynïasoh noh hapdeng ka nongbah Shillong bad Tura lyngba ka liengsuiñ.
Ïa kane ka jingkyrpad la pynsngew da u Myntri Rangbah u Conrad K Sangma ha ka jingïakynduh bad u Myntri ka tnat liengsuiñ ka Sorkar Pdeng u Ram Mohan Naidu Kinjarapu u la pynsngew ïa ki jingdonkam jong ka Jylla ban kham biang ka jingpynïasoh lyngba ki liengsuiñ bad la kyrpad ban pyntreikam noh ar sien haba kut taïew (weekend) ïa ki liengsuiñ na Umroi.
Shuh shuh u la ong ba donkam ruh ban pynurlong ïa ka jaka hiar bad her liengsuiñ (runway) jong ka Kad Liengsuiñ Baljek ha Garo Hills khnang ban donkam ruh ban don ka jingpynïasoh hapdeng ka Shillong bad Tura lyngba ka liengsuiñ. Nalor kine, u Myntri Rangbah u la pynsngew ruh ïa ka jingdonkam ban tei ïa ki jaka hiar helicopter ha ka Jylla ka ban kham pynsuk haba donkam kyrkieh ban leit da ka helicopter sha kino-kino ki jaka ha kane ka Jylla bad lada wan ki heh ki haiñ sha kane ka Jylla.
Kumta na ka liang u Myntri ka tnat liengsuiñ u la kular ban peit ïa kine ki jingdonkam jong ka Jylla.
