Nongpoh, Jylliew 28
Ka Dr Mazel Ampareen Lyngdoh, Myntri ba dei khmih ïa ka tnad Information & Public Relations bad kiwei-kiwei ha ka Sngi Thohdieng ka la wan ban plie paidbah ïa kawei ka shlem khubor bathymmai jong ka Jylla kaba dei na Ri-Bhoi District ïa kaba la ai kyrteng kum ka ‘Meghalaya Post.News’.
Ïa kane ka shlem khubor bathymmai ha ka Jylla, la seng da u Bah Cornelius Laloo ryngkat ka kynhun jong ki nongthoh khubor ka Ri-Bhoi kum shi bynta ban ai rynsan ïa la ki para nongthoh khubor ba kin ïoh ïa ka lad ban shakri kham bha ïa ka thaiñ bad ka Jylla hi baroh kawei bad khamtam ba kin ïoh ban ai ïa ka jingshakri kaba paka tam na ka bynta ka jingmyntoi jong ki paidbah.
Ha kane ka sngi ba la plie paidbah ïa kane ka shlem khubor bathymmai, la wan ban ïadon ryngkat u MLA ka Nongpoh, Bah Mayralborn Syiem, u MLA ka Mawhati, Bah Charles Marngar, u MDC ka Nongpoh, Bah Balajied Rani, ki nongïalam seng ba kynthup naduh u President ka FKJGP, Bah Dundee Cliff Khongsit, u President ka RBYF, Bah Bipul Thangkhiew, u President ka HANM, Bah Lam Kharbani bad kiwei-kiwei.
Haba kren ha kane ka sngi, ka Dr Mazel Ampareen Lyngdoh ka la pynpaw ïa ka jingsngewkmen ban ïadon bynta ha kane ka sngi kaba la ïoh ban plie paidbah ïa kane ka shlem khubor bathymmai ka ban dei lyngba ka ‘website’, ki lad pathai ‘social media’ bad lyngba ki dur khih ki ban sa mih ha ‘YouTube’ shen.
Ha kawei ka bynta, ka Myntri ka la pynpaw ïa ka jingsngewkhia halor ka jingjur jong ki khubor thok ha kane ka juk stad kaba mynta bad kyntu ïa ki nongthoh khubor ba ki dei ban long kiba wad bniah ïa ki jingshisha bad ban thoh ïa kiba khlem shah liang ïano-ïano, ki ban ai jingmyntoi, ai jingtip bad kiba tei ïa ka imlang ka sahlang.
