Beirut, Jylliew:
Ka Hezbollah ha ka Sngi Palei, ka la pynbna ba ka la ioh ban ther bom sha ka jaka treikam ki shipai ka Israel kaba don Shathei jong ka Israel kum ka jingpynphai kylliang ia ka jingther bom ka Israel sha Lebanon ha kine ki khyndiat sngi ba la leit ha kaba 4 ngut ki shipai ka Israel ki la kyllon iap ha katei ka jingjia.
Wat la ki tnat bad ki ri bapher bapher jong ka pyrthei ki la pynpaw ka jingsheptieng ioh ka jingiakynad hapdeng ka Lebanon bad ka Israel kan wanrah ia ka thma kaba jur ha Middle East, hynrei la ong ba ka Hezbollah bad ka Israel ruh kumjuh, kim don jing- salia ne patiaw halor kitei ki jingmaham jong ki tnat ka pyrthei ban kiar na kitei ki jing-iakynad. Kane ka lah ban wanrah ia ka thma bah kaba jur na baroh arliang ri kiba ju ia pyni bor na kawei ka sngi sha kawei pat da kaba ther bom markylliang ban pynpaw ia ka mynsiem bym pyndem kawei ia kawei pat.
Ka Hezbollah, kaba long ka paralok bad nongkyrshan jong ka kynhun lehnoh Hamas kaba synshar hi ia ka nongbah Gaza, ka la iathuh ba ka Israel ha kine ki khyndiat sngi ka la thombor dusmon ia ka Lebanon bad kumta ka Hezbollah ruh ha kane ka por ka hap ban pynphai kylliang naka bynta ka hok jongka. Bad ha katei ka sngi, la ong ba ka la ioh ban shim ruh ia 4 ngut ki mynsiem briew jong ka Israel da kaba ther bom sha ka jaka ba don ka jaka pynher ‘namding bad jaka ther bom jong ka Israel, kaba sha ka phang North hapoh ka shnong Sohmor jong ka nongbah Nabatiyah.
Kumjuh ruh na ka liang ka Israel ha katei ka sngi ka la pyntip ba ki la don kumba 35 tylli ki bom lane ki ‘namding kiba wan poi na Lebanon hynrei bun na kitei ki bom ki dei kiba la ioh ban tehlakam noh da ka tnat iada jong ka Israel bad tang katto- katne ki la ioh ban bthei bad pynjulor ia ka Israel.
Ha katei ka jingpynphai kylliang jong ka Israel, la iathuh ba ka Israel ruh ka la ioh ban pynliem ia 3 ngut ki dkhot jong ka Hezbollah, ha kaba uwei u dei uba don ha ka thaiñ Sohmor bad 2 ngut pat sha ka phang South jong ka Lebanon.
Shuh shuh ruh ka Israel ka la iathuh ba ki bor pahara ka Israel ki la ioh ban siat pynhap ia 2 tylli ki drone kiba wan poi na Lebanon bad kiba la leit hap noh sha ka phang North jong ka Israel.
