Shillong, Jylliew 28
Ka Meghalaya State Olympic Association (MSOA) ka la pynpaw ba ym lah ban sei ïa ki nongïalehkai ki ban paw ha ki lympung ïalehkai shabar jylla tang ban shu pynlong ïa ka Meghalaya Games tang shisien ne tang hadien 16 snem.
“Mynshwa ngim shym la don wat tang ka Sports Policy, hynrei mynta la ithuh ïa kane ka policy. Te kumta lyngba ka jingdon ïa ka Sports Policy ka la ai jingbit ba dei ban pynlong ïa ka Meghalaya Games, dei ban don ki lympung ïalehkai hapoh ki district bapher bapher,” la pynpaw u Working President ka MSOA u Bah John F. Kharshiing ha ki lad pathai khubor ha ka sngi Palei.
La pynlong nyngkong eh ïa ka Meghalaya Games ha u snem 2001, hadien lai snem ba la lah ban pynlong biang ha u 2004. Te kumta hadien 16 snem la lah ban pynlong biang ïa ka Meghalaya games ha u snem 2020. Te kumta hadien la lah ban pynlong biang ïa ka ha u 2023 ha Shillong bad ha u 2024 ha Tura.
“Ym lah ban leh ba kiba bun ki synjuk ïalehkai kim shym la lah ban pynlong ïa ki lympung ïalehkai (state level) na ka daw ka jingïoh duna ki lad jingïarap na ka Sorkar Jylla, te kumta lyngba ka Meghalaya Games ka la long ka jingplie lad ïa kiba bun ki synjuk ïalehkai bad ruh ban sei ïa ki nongïalehkai ki ban mihkhmat ia ka Jylla sha ki lympung ïalehkai shabar jylla,” la bynrap u Bah Kharshiing.
“Ngi sngewkmen ba ka jingdon ka policy, ki synjuk ïalehkai ki la ïoh ïa ki lad jingïarap na ka Sorkar.”
Ha kawei pat ka liang u General Secretary ka MSOA u Bah Finely Pariat u la ong, “Ngi sngewkmen ba mynta ngi la ïoh ban pynlong man la u snem ïa ka Meghalaya Games bad lada pynlong hadien 16 snem ngin nym ïohi shuh ïa ki nongïalehkai napoh ka Jylla.”
U la ong ba mynta ka jingbet ïa u symbai ka danglong tang 2 snem bad kumno ngin khmih lynti ban sei ïa ki nongïalehkai ki ban paw ha ki lympung ïalehkai North East Games ne ha ki National Level.
