
Shillong, Jylliew:
Ka jingkhlong ïa ka ktieh na Wah Brahmaputra ha Assam ka lah ban long ka daw ba ka jingshlei um ka kham duna ha ki katto katne ki jaka ha ka por lyiur khamtam ha ki jaka ba madan ha Assam bad ki jaka ba madan ha Rilum Garo.
Hynrei haduh mynta ym pat don kano-kano ka jingwad bniah ban tip la ka jingshlei um ka kham duna hadien ba la khlong ïa ka ktieh (drenching) ha shilynter ka wah Brahmaputra.
Haba ïakren bad u Commissioner and Secretary ka tnat Disaster Management ka Jylla, u Sanjay Goyal, u la ong ba ka long ka jingshisha ba ka jingshlei um ka kham duna ha ki jaka madan (plain areas) ha Rilum Garo ha kine ki khyndiat snem, hynrei ym lah ban ong la ka dei namar ka jinghiar ka um ha Wah Brahmaputra hadien ba la khlong ïa ka ktieh ne na kano ka daw.
U la ong ba ka jingshlei um ha ki jaka madan ha Rilum Garo khamtam kiba don markhap bad ka Assam ki ju mad ka jingshlei um kaba kham jur haba wan tuid ka um kaba shlei na ka Wah Brahmaputra haba jur u slap.
Hynrei ha kine ki khyndiat snem, ka don ka jingduna khyndiat ka jingshlei um ha kito ki jaka ba madan kiba hap ha West Garo Hills khamtam eh kum ka thaiñ Phulbari bad kiwei ki jaka kiba don markhap bad ka Assam.
“Ngim nud ban ong ne batai namar ym pat don ka jingwad bniah la ka jingduna ka jingshlei ha ka por lyiur ka dei na ka daw ba la khlong teng ïa ka ktien na Wah Brahmaputra ne na kano ka daw,” la ong u Goyal.
U Goyal u la ong ba ki don katto katne tylli ki wah ha Assam kiba lah ban kiew bha ka um haba jur u slap bad ka jingkiew ka um ha ki wah ha Assam ka wanrah ruh ka jingshlei um ha ki jaka ba madan ha West Garo Hills district.