Berlin, Jylliew:
Ka iingbishar jong ka Germany ha ka Sngi Thohdieng ka la rai ban set patok haduh 4 snem ia uwei u khynnah 15 snem halor ka jingdon kti ban iasuh-buit thombor ha ka iew Khristmas hapoh ka thaiñ West jong ka nongbah Leverkusen.
Ka iingbishar ka la iathuh ba utei u khynnah ha katei ka por, u thmu ban leit shim wai da ka trok bad ban rat pyniap dusmon ia kat kiba don ha ka lynti iaid ban leit sha katei ka iew Khristmas.
Namar la ong ba utei u khynnah u la sdang ban don ia ka jingibeiñ jaitbynriew naduh ka aïom Synrai jong utei u snem 2023 ba la leit bad kumta u la thmu ban leh ia katei ka kam thombor pat ha katei ka por Tlang ba ki briew ki ju ia mih bha ban leit thied jaiñ- thied nep bad ban thied ia ki jingthied kiba iadei bad ka por Khristmas.
Hynrei la ong ba ki kynhun syntiat ki la lap ia ki jingkren jong utei u khynnah hapoh ka kynhun jong u bad kiba ia don kti lang ban iatrei lang bad u halor ki jingthmu jong u bad katei ka kynhun ban leit thombor ia kitei ki nong-leit sha katei ka jaka iadie-iathied. La ong ba ka dur ba katei ka kynhun ka buh kum ka dak ne ka shap na ka bynta katei ka ‘group chat’ ka dei ka dur kaba don ia ka shap ka jaitbynriew ‘Islamic’.
La ong ba utei u khynnah u la thmu ban leh ia katei ka kam ha ryngkat bad uwei u khynnah uba la kular ban ring dur ia u ynda u ñiah ia katei ka trok bad ban pynsaphriang ruh ia katei ka dur-khih.
Kumta, ia utei u khynnah 16 snem na Brandenburg pat, la ong ba yn sa pynsngap kyrpang ia katei ka mat kaba iadei bad u ha une hi u Naitung.
Ki pulit ki la iathuh ba utei u khynnah 15 snem u la phla hi da lade ia kitei ki jingthmu baroh haba la pyni ia u ia kitei ki jingiakren ba la lap na katei ka ‘Group Chat’.
Namar la ong ba ki kynhun lehnoh Islamic ki la wanrah bun tylli ki jingjia thombor hapoh Germany naduh kine ki snem ba la leit ruh, bad kaba kham shyrkhei tam ka long ha u Nohprah jong u snem 2016 hadien ba kawei ka trok ka la leit rat ia kat kiba don ha ka lynti iaid ban leit sha ka jing rakhe Khristmas, ha kaba 12 ngut ki la duh ei ia ka jingim ha katei ka jingjia ha utei u snem.
Ka tnat wad bniah jong ka Germany ka la iathuh ruh ba ki don kumba 27,000 tam ki suba lehnoh kiba dei jong katei ka kynhun Islamix kiba don hapoh Germany.
Namarkata, ka Myntri kam poh iing jong ka Germany- ka Nancy Faeser kaba la pynbna ia katei ka kaiphod jingdon jong ki suba lehnoh hapoh ka ri, ka la ong ba ka sorkar Germany kan ialeh ban tehlakam ia baroh ki kam thombor jong kitei ki kynhun lehnoh bad ban pynduh jait ruh ia kitei ki lehnoh khnang ban lah ban wanrah ia ka shongsuk- shong saiñ bad ka jingshngaiñ ia ki paidbah nongshong shnong jong ka ri.
