Shillong, Jylliew 30
Ka Canada ka la ïoh rung sha ka quarter-final jong ka lympung ïalehkai Copa America ha ka sien kaba nyng-kong bad ka dei ruh sien ba nyngkong eh ba ka la ïoh ban ïashim bynta ha kane ka lympung.
Kane ka jingïoh rung ka Canada sha ka quarter-final ka la wan hadien ba ka la lah ban pynïakhaid ha ka jingïa -khun pyrshah ïa ka Chile ha kaba ym shym la don kiba ïoh ban khyrwit kol.
Ka Chile kaba la rah haduh ar sien ïa ka nam lahduh jong ka lympung Copa America, ka la donkam ban pynliem ïa ka Canada ban ïoh rung pat sha ka quarter-final hynrei ka bok kam shym la don satia bad ki, naba tang ha ka minit ba 28 jong ka jingïalehkai, u rangïaleh-kai dien jong ka, u Gabriel Suazo u la shah sei ka yellow card kaba ar, kaba la pynlong ruh ba un shah beh noh na madan.
Watla tam uwei u rangïalehkai, ka Canada kam shym la lah ban shimkabu satia bad duna bha shakhmat hynrei ka la phai khmat beit ban ïaleh ban pynïakhaid beit.
Ka Chile, kaba la rah ïa ka nam lahduh jong kane ka lympung ha u snem 2015 bad 2016, ka la duh ban rung sha ka quarter-final ha ka sien kaba nyngkong eh ha kine ki 24 tylli ki snem.
Hadien ka jingïoh rung sha ka quarter-final, ka Canada mynta kan pynkhreh pat ban ïakhun ïa ka lahduh na ka Group B.
Haba phai pat sha kawei ka jingïalehkai, ka Argentina ka la lah ban pynliem noh ïa ka Peru da 2-0 kol bad ban don hakhlieh duh ha ka Group, hadien ba ka la khur jingjop ha baroh 3 tylli ki jingïalehkai.
Haba phai sha ka jingïalehkai, ïa baroh ar tylli ki kol jong ka Argentina la ïoh ban khyrwit da u Lautaro Martinez uba dei ruh u rangïalehkai shakhmat ka club Inter Milan.
Ka Argentina hadien kane ka jingjop, mynta kan pynkhreh pat ban ïakhun pyrshah ïa ka kynhun kaba wan ba-ar ha ka Group-B ha ka jingïakhun quarter-final ka ban long ha ka sngi Thohdieng.
