Mairang, Jylliew 30
Ki nongpang kiba la poi sha Mairang Hospital hadien ba ki la kem pang na ka bam jong ka jingleit sngewlem ha kawei ka ïing ïap briew, la ong ba ha ka Sngi U Blei ki la don kiba leit phai ïing noh hadien ba ïoh ïa ka jingsumar.
Ïa kane la pyntikna ruh da u Medical Superintendent ka Tirot Sing Memorial Civil Hospital, Mairang haba kren ha u nongthoh khubor lyngba ka ‘phone’ ha ka Sngi U Blei.
U MS kane ka Hospital u la ïathuh ruh ba kine kiba la wan poi sha Mairang Hospital ki dei kiba prie-pynhiar bad suh bad ka jingpang jong ki – kaba dei na ka ‘Food Poisoning’, bad u la ïathuh ruh ba hapoh katei ka Hospital kitei ki nongpang ki la wan poi kumba 50 ngut tam, hynrei kaba sngewtynnad ka long ba mynta kitei ki nongpang ki la kham ïoh ïa ka jingkoit bad ki la don ruh kiba la leit phai ïing noh.
U MS u la ïathuh ruh ba halor katei ka jingjia, na ka liang ki bor distrik ki la dep ban phah leit ruh ïa ka tnad ba dei peit sha ka shnong Nongdom ban phah ‘test’ bad shim nongmuna ruh ïa ki jingbam na katei ka ïing.
Lah ban kdew hangne ba 50 ngut eiei ki briew ki la poi sha Tirot Sing Memorial, Civil Hospital Mairang hadien ba la suba ba ki la kem pang na ka bam jong ka jingleit sngewlem ha kawei ka ïing ïap briew ha ka shnong Nongdom, kaba dang hap hapoh Mawthadraishan C& RD Block, Eastern West Khasi Hills.
Shuh shuh katei ka jingjia ka la jia naduh ka 28 tarik u Jylliew ha kaba kumba 10 ngut ha katei ka sngi ki la pang bad poi shah sumar ha ‘hospital’ katba ha sngi 29 tarik u bnai Jylliew sa kumba 40 ngut eiei ki la poi shah sumar ha kane kajuh ka ‘hospital’.
