Mumbai, Jylliew 30
Ha kawei ka jingjia kaba isangsot ha ka Sngi U Blei, u kpa, ka kmie bad ki khun ki la ïakdup lang hapdeng ka umbam umsan ha kawei ka kshaid kaba don ha Lonavala hajan ka sorbah Mumbai ha shwa ba kin shah rong ha ka um. Na kine, tang arngut ki la lait hadien ba ki la ïoh ban jngi.
Katei ka longïing longsem kaba don hynñiew ngut ki dkhot ka la leit sha katei ka jaka pyngngad kaba don kumba 80 km na Mumbai.
Haduh mynta, kat-kum ka khubor na ka NDTV, la ïoh ban sei ïa lai tylli ki metïap bad ka jingwad ïa kiwei pat kiba dang jah kan bteng ha ka step Lah Sngi U Blei.
Kumba long lem kiwei, katei ka longïing ka la leit kai pyngngad sha katei ka kshaid ha ka Sngi U Blei. Kane ka jaka ka don hajan ka Bhusi Dam. La ong ba na ka daw jong ka jingther jong u slap, kane ka Dam ka la shlei bad na ka jingshlei jong ka, ka la pynkiew ïa ka um ha katei ka kshaid.
Ka dur khih kaba la saphriang ka pyni ïa ki khyllipmat bakhatduh ba ki dkhot jong katei ka longïing longsem ki la ïeng halor jong u maw hapdeng jong katei ka kshaid bad ki la ïakdup iwei ïa iwei pat da ka jingkyrmen ba kin lait na ka jingmynsaw.
Hynrei tang hadien katto katne por, ka jingkhlaiñ jong ka um ka la rong noh ïa ki dkhot jong katei ka longïing longsem hapdeng ka jingpyrta ban ïoh jingïarap.
Kiwei pat ki briew kiba la don hajan jong katei ka kshaid ki la wad jingïarap, hynrei namar ka jingkhlaiñ palat jong ka um, ym shym la don satia kiba lah ban kynthih sha um ban ïarap ïa kitei ki briew.
Katei ka la jia ha ka por kumba 1:30 mynsngi. Na ka liang ki nongshong shnong bad ki pulit ki la leit bran-bran sha katei ka jaka ban wad la ki dang don ne em kiba lait im.
Katkum ka khubor na ki pulit, kitei ki briew ki la kum hap ha kshaid bad ki la ngam jyllop kham sharum. Ki nongshong shnong jong katei ka jaka ki la suba ba kitei ki briew ki la ïeng halor u maw ba syntuid ha tmier jong ka kshaid, bad ki la shah rong noh ha ka bor jong ka um.
