Ynda la kiew dor palat kiei kiei, ka jingkyrduh ka ap namar ka jingkamai ka sah kumjuh. Namarkata, kine ki kyntien: Ka jingkyrduh u raïot ka pynjot ïa u syiem bad ka hima: ïa ka pop yn kit mano? – ba la sot na ka jingïathuh khana shaphang “U Kulai Bad Ka Kada Ba Pang” na ka kot “Ki Phawer U Aesop” ki ïahap bad ka jinglong jingman kaba mynta. Lada kyrduh u raïot, ka sorkar ruh ka kyrduh. Hadien ba la kut ka ilekshon, ngi nang pyrkhat ba ka sorkar BJP kan leh eiei noh ban pynhiar ïa ka dor ka mur jong ki mar ki mata bakongsan khnang ban ïa ïoh im lang baroh. Hynrei ka la bunkam ha ka ban ïakhun pyrshah ïa ka liang pyrshah hadien ba la dep ka ilekshon. Ka la klet imat ba ki don ruh sa kiwei pat ki nongshong shnong kiba hap ban im. Ym dei tang shu lapmiet ha ka thma saiñpyrthei. Ngim tip haduh lano ka sorkar u Narendra Modi kan kyndit bynriew noh na ka jingïohthiah lyngngai.
Suki pa suki, ka jingkiewdor kan pynring sdot ïa kiba bun ba lang ha kane ka Ri jong ngi. Naduh ka jingrem u jhur u jhep haduh kiwei pat ki mar ki mata, kan sa poi ka por ba kin don kiba ym lah shuh ban kot bor ban thied eiei. Hynrei hapdeng kane, ki don ruh pat kiba shimti halade ïa kata ka bor ka iktiar ban lum khajna be-aiñ da kaba shim pisa na ki trok kit mar. Kine ki trok, nalor ba ki hap ban siew sha ka sorkar, ki hap ruh ban siew khajna sha kita kiba pyni ba ki don ka bor ban lum pisa na ki khlem kano-kano ka nongrim. Ka sorkar ka khlem aibor ïano-ïano la ki dei ki riew shimet ne ki kynhun ban lum khajna nangno-nangno.
Kiba leh kumta ki dei ki riew be-aiñ namar kam don kano-kano ka aiñ kaba batai ba ki kynhun kiba khlem pat ithuh da ka Riti Synshar ki lah ban lum khajna. Tangba lada ngi ïoh da ka sorkar kaba ai mon ïa ki briew ba kin leh katba ki sngewbit, ki mih keiñ ki riew shimet bad ki kynhun kiba shlan ban lum khajna (lute, ha ka jingshisha) im-im peit-peit khlem jingtieng. Kumno yn hap ban siew ïa ki riew shimet ne kynhun haba ïaid na ka surok paidbah ba la shna da ka National Highways Authority of India (NHAI) lane ka Public Works Department (PWD) jong ka sorkar jylla? Ki dei kiei kita ban lum khajna nalor ba la dep siew ïa ka khajna kum ka Goods & Services Tax (GST)? Naei pat kita ki nongpynpoi ïa ki mar ki mata kin khyllie ïa ka pisa kaba ki la duh ha kaba siew sha kita ki riew shimet bad ki kynhun? Kim banse ban pynkiew da ka dor ha ïew ha hat ban ïoh khyllie ïa kaba la duh. Mano ban hap siew ïa kata? Ki paidbah! Namarkata, ngi ju ïohsngew ïa ka jingud jingnam jong ki paidbah haba don ka jingkiewdor.
Kano-kano ka sorkar ka hap ban khyrwit da u shabuk pyrshah ïa kito kiba ïaid lait na ka aiñ. Ka sorkar kam lah ban shu leh kum bym tip haba don ki nongkhrong khajna be-aiñ kiba kamai na ka bynta ka jingmyntoi shimet. Lada ka shu sngap mynthi, ka pyni ba ka sorkar ruh ka kyrshan lane ka ïadonkti lang bad kita ki nongleh be-aiñ ki bym don shuh ka raiñ ka rem ban lum pisa ban myntoi ïalade. Kim salia wat lada ïap ei ki paidbah baduk bakyrduh haba wan ka jingkiew dor ki mar ki mata. Kim salia ban kjit ïa ka umsyep jong kiwei. Kim salia ban leh ïa kano-kano ka kam be-aiñ tang ban biang ïalade. Kaba thamula ka long ba ka sorkar ka tip shai ba ki don kum kita, hynrei bunsien ka phai da ka lyngkdong bad ka leh kumba khlem jia eiei.
Haba ki ïoh ïa kiba kum kita ki sorkar, ki paidbah ki dei kiba ïap nyngkong eh namar ki hap ban siew kham bun ban ïa kaei kaba ki dei ban pynlut. Lehnohei ka jingbun jong ki kyndon aiñ lada ka sorkar ka leh kumba kam tip ba ki kam be-aiñ ki ïaid. Haba don ka iktiar ba la pynkupbor da ka Riti Synshar, balei ban tieng ban pyndonkam ïa ka? Kan eh aïu ban leh bha ïa ki paidbah da kaba pyntreikam hok ïa ki aiñ pyrshah ïa ki nongkjit ïa ka umsyep jong ki nongshong shnong? Ka sorkar kan shu ïoh jingïaroh ei na ki paidbah lada ka ïaid ha ka lynti kaba ka dei ban ïaid bad ban khyrwit ïa ki nongleh ïa ki kam be-aiñ. Ki paidbah ki sngewtynnad beit haba ki ïohi ba don ka sorkar kaba trei hok shisha na ka bynta jong ki.
Ka la dei ka por ïa ki paidbah ba kin ïeng pyrshah ïa ki nonglum khajna be-aiñ namar ka ktah ïa ki hi manla ka sngi haba ki hap ban siew ban tda bad ban rah ja rah jhur sha la ïing la sem. Lada ki paidbah ki ïai sngap jar, ka long kumba ki ai mynsiem ïa ki nongleh ïa ki kam be-aiñ. Ka jingsngap mynthi ka dei ka jingailad ïa ki nongpynjot ïa ka jylla. Hynrei lada ki paidbah kim sngeweiei ban siew ïa ka dor kaba kham heh, yn ym don satia ba lah ban leh da kumwei pat.
