Shillong, Jylliew 30
Ka Germany ka la ïoh rung sha ka quarter-final jong ka lympung Euro 2024 hadien ba ka la lah ban pynliem noh ïa ka Denmark ha ka jingïa-lehkai kaba la shah pynthut shipor ha ka leilieh, erïong bad u slap ba jur.
Ha kane ka jingïaleh-kai ka Germany ka la lah ban pynliem noh ïa ka Denmark da 2-0 kol bad ïa kine ki kol la thep da u Jamal Musiala bad u Kai Havertz.
Haba phai sha ka jingïalehkai, ka kylla step ka la long kaba ïakhaid bha, ha kaba baroh ar liang ki la ïakhun tyngeh hynrei kim shym la lah ban pynkhih jar bad haduh ba kut ka jingïalehkai ym pat don ba ïoh thep kol.
Haba bteng ïa ka kylla miet, ka Germany ha ka minit kaba 53 ka la ïoh ïa ka penalty, ha kaba la wan shakhmat ban shut ïa ka bol da u Kai Havertz uba la khyrwit jlang shapoh ka kol, kaba la pynkhie risa ïa ki nongkyrshan bad katba ka jingïalehkai ka dang ïaid, dei ha ka minit ba 68 ba u Jamal Musiala u la ïoh ban khyrwit ïa ka kol kaba ar, kaba la biang pura ïa ka Germany ban pynthikna ïa ka jingjop.
Kane ka jingïalehkai kaba la long ha West-falenstadion, Borussia Dortmund ka la shah pynsangeh noh kumba 20 minit eiei namar ka jingther jong u slap ba jur ryngkat ka ‘erïong bad ka leilieh bad hap phria.
Hadien kane ka jing-jop, mynta ka Germany kan pynkhreh ban ïakhun pyrshah ïa ka nongjop na ka jingïakhun hapdeng ka Spain bad Georgia. Kane ka jingïakhun quarter-final kan long ha ka sngi Thohdieng ka 5 tarik Naitung.
