Aizawl, Jylliew 30 (UNI)
Ka Sorkar Mizoram ka dang ïai ap ïa ka jubab na ka tnad ka koit ka khiah ka Sorkar Pdeng haba ïadei bad ka jingkyrpad jong ka ban pyllait noh na ka jingpynkylla kyrteng ïa ki ‘Health and Wellness Centre’ sha ki ‘Ayushman Arogya Mandir’, la ong ka heh ophisar ha ka Sngi U Blei.
Ka Secretary jong tnad ka koit ka khiah ka Jylla, ka Sangchin Chinzah ka la pyntikna ba ym shym la don kano-kano ka jingpynsngew kaba la ïoh pdiang na ka Sorkar Pdeng halor katei ka bynta.
Ka rai jong Sorkar Pdeng ban pynkylla kyrteng ïa ki ‘Ayushman Bharat Health and Wellness Centre’ kum ki ‘Ayushman Arogya Mandir’ ka la wanrah ka jingbynñiaw ha Mizoram, ha kaba 90% na ka jingbun briew ki pynithuh kum ki Khristan.
Ka Sorkar Jylla ka sheptieng ba kane ka kyrteng thymmai, kaba mut “Temple of Ayushman”, ka la ban wanrah ïa ka jingsngew pher kum ka jingkyntiew ïa ka niam Hindu bad buh sharud ïa ki Khristan bun paid.
Ha ka jingthoh sha u Secretary ka tnad ka koit ka khiah ka Sorkar Pdeng, ka Principal Secretary ka Jylla, Esther Lal Ruatkimi ka la pynpaw ka jingsngewkhia ba ka jingpynkylla kyrteng ka lah ban wanrah ïa ki jingsngew ki bym sngewtynnad hapdeng kiba bun balang pyrshah ïa ka Sorkar bad kyrpad ïa ka jingpyllait na kane ka jingpynkylla kyrteng.
Ka Mizoram kam long marwei ha kane ka liang, naba ka Nagaland, sa kawei ka Jylla ha kaba kiba bun paid ki dei ki Khristan ki la pynpaw ka jingpyrshah halor kane.
Ka Sorkar ka kwah ban pynneh ïa ka kyrteng ba mynta – ‘Ayushman Bharat Health and Wellness Centre’, ban kiar na kino-kino ki jingpyrshah na ka imlang-sahlang.
Ka jingpynslem ban jubab na ka liang ka Sorkar ka la buh ïa ka tnad ka koit ka khiah ka Jylla ha ka umdum, bad ki ophisar ki ïai ap ïa ka jingpynshai halor kane ka mat.
