Shillong, Jylliew 30
U kapten ka Real Madrid u Nacho Fernandez u la pynkut noh ïa ka kam ïalehkai ka jong u bad Real Madrid hadien shi bnai ba u la ïadon bynta ban jop ïa ka nam lahduh ha ka Champions League.
Ïa kane la pynbna da ka Madrid halor ka rai jong u Nacho, hadien lai taïew ba kane ka klob ka la pynliem ïa ka Borussia Dortmund ha Wembley ban khur ïa ka rekod kaba 14 ha ka European Cup. Kane ka long ka sien ba hynriew ba u Nacho u la iadon bynta ban khur ïa ka jingjop ha ka Champions League bad ka Madrid, ka sien kaba nyngkong kum u kapten.
Kumba ka paw u Nacho u la lah ban pynurlong ban khur haduh 26 tylli ki trophy nam lahduh na ka bynta ka Madrid.
“Ka Real Madrid ka pynpaw ka jingai khublei ïa u Nacho, uba long uwei na ki rangïalehkai ba kynsai jong ka klob,” la pynpaw ka klob.
Une u rangïalehkai ba 34 snem ka rta, uba la ïadon bynta bad ka Spain ha ka European Championship, u la don ha Madrid la palat 20 snem, naduh ba ïasoh nyngkong bad ka klob ha u 2001.
“Nga la pynïasoh sha kane ka klob naduh ka rta kaba nga dang 10 snem bad kum u rangïalehkai nga la nangkiew shaphrang,” la ong u Nacho ha ka shithi sha ki paidbah nongkyrshan kaba u la buh hapoh rynsan social media. “Haduh 25 snem nga la ïoh ban kilanmet ha kane kajuh ka jaka, na ka bynta ban ïoh shibun ki buit ïalehkai jong ka Madrid bad nga ïa nga ka jingim ha ka kam ïalehkai phutbol.”
Ïa mynta u Nacho um shym la pynpaw eiei sha kano ka klob un leit ïasoh, hynrei kat kum ka khubor na Spain ki la pynpaw ba u la pynkhreh ban leit ïasoh noh sha ka kynhun ïalehkai kaba ha Saudi Arabia.
