Aizawl, Jylliew:
Hapdeng ka por jong ka jingïakynduh jingeh jong ki nongshong shnong jong ka Myanmar kiba la dawa ban shong buhai shnong ha Mizoram kum ki poiwir, ka sorkar jylla ka la buh ka jingkyrpad ban ïarap pisa na ka sorkar kmie na ka bynta ban pynbiang ïa ki jingdonkam baroh, la ïathuh ki heh ba dei khmih.
Ha ka por ba la don ka jingïalang hashwa ban wanrah ïa ka dorbar mang tyngka, ki Myntri ka tnat ka pla tyngka na ki jylla bad ki Union territories, ba la pynlong da ka Myntri ka tnat pla tyngka jong ka sorkar kmie ka Nirmala Sitharaman ha Delhi ha ka taïew ba la lah, u Myntri Rangbah jong ka Mizoram u Lalduhoma u la pynpaw ba ka Mizoram haduh mynta kam pat ïohpdiang ïa ka Security Related Expenditure (SRE) Funds na ka sorkar kmie wat lada ka la ïakynduh ïa shibun ki jingeh na ki kynhun pyntriem kiba nabar ri.
Ki kam thombor jong ki riewkieng atiar ha Myanmar ym tang ba ki pynher krad ïa ki riewpaidbah, hynrei wat ïa ki shipai jong ka tnat Myanmar Army ruh kumjuh, ha kaba ha ki bnai ba la lah haduh mynta ki la don palat 400 ngut ki shipai kiba la poi sah kum ki poiwir ha Lawngtlai distrik kaba don ha Mizoram hadien ba ki jaka treikam jong ki ki la shah thombor ha ki lehnoh jong ka kynhun Arakan Army (AA), ha kaba kine ki la shah pynphai noh sha ka ri jong ki, la ïathuh ki heh shipai.
Ki heh shipai ha Aizawl ki la ong ba ka kynhun jong ki shipai Myanmar ha ryngkat ki tiar siat bad ki kuli ki la poiwir ha ka shnong Bandukbanga kaba don ha ka khappud ha lad jong ka Mizoram-Myanmar-Bangladesh ha ka bynta ba shaphang Shathie jong ka Lawngtlai distrik hadien ka jingshah pyni bor ha ki kynhun kieng atiar.
Kine ki shipai ki la sha pynphai biang sha ka ri ba ki wan ha ryngkat ka jingïakren bad ki heh shipai jong katei ka ri ba ka la dei ban pynïoh ki lad jingïada ba kyrpang na ka bynta ki nongshong shnong bad kumjuh ïa ki kynhun ïada ri bad ban ïakhun pyrshah ïa ki riewkieng atiar kiba leh donbor ha ka ri na ka por sha ka por.
Ki shipai ka tnat Assam Rifles ki la pahara ha ka jaka kaba jngai kumba 510 km ha Mizoram ban kerkut ïa ki bynta khappud bad ka Myanmar.
Da ka jingdon jong kine ki shipai Myanmar mynta kiba la poiwir sha Mizoram, naduh ka 13 tarik, Naiwieng jong u snem ba la lah haduh une u snem ba mynta, ka la long hapoh shi hajar ngut.
