Brussels, Jylliew:
Ka European Union (EU) ha ka Sngi Thohdieng ka la khang bad pynduh noh ia ki jingdon-jingem, ki jing-iadei kam bad ki ‘Visa’ jong katto katne ki kompeni lane ki ‘riewshimet kiba ai jingkyrshan bad phah pisa sop-sop sha ka kynhun lehnoh Hamas kaba dang iakhun thma pyrshah ia ka Israel ha kane ka por.
Kane ka jingpynngat kyndon ha kane ka sien, ka dei ruh ka sien ba ar ia ka EU ba kan pynngat kyndon ia kito kiba don kti ha ka ban ai jingkyrshan ia ki lehnoh Hamas namar ka jingleit thombor jong kane ka kynhun lehnoh ia ka Israel ha ka 7 tarik u Risaw 2023.
Nalor kata, la ong ruh ba ka EU ka la duh dak saw ia 12 ngut ki riew shimet bad 3 tylli ki kompeni kiba don jingiadei ne iatrei lang bad ka Hamas ha kum kane ka por.
Ha kajuh ka por, ka EU ka la pyntip ba ka la pynngat kyndon ruh ia u Ali Morshed Shirazi, uba long u heh ka Iranian Islamic Revolutionary Guard Corp halor ka jingleit ai jingkyrshan jong ka Iran ia ka Hamas kaba synshar ia ka nongbah Gaza.
