Shillong, Jylliew 30
Kum ka dak ban pyrshah halor ka jingthmu ka Sorkar ban shna ïa ka jaka theh ñiut ha ka shnong Nonghali, ka Synjuk ki Nongsynshar Shnong Par Umkhen Area (SNS-PUA) ka la rai ban pynlong da ka jingpynsngew paidbah ha jingkieng Umkhen ha ka 6 tarik u Naitung mynta u snem.
“Ngi la shim ïa ka rai sa shisien ban ai ka sur jong ka jingpyrshah halor ka jingthmu ka Sorkar ban shna ïa ka ‘Marten’ hapoh Nonghali, ha u Lum Sohlait,” la ong u President ka SNSPUA, Bah S. Rngaid hadien ka jingïalang jong ka Synjuk kaba la long ha ka Sngi Saitjaiñ.
Ka Synjuk ka kynthup ïa 15 tylli ki shnong jong lai tylli distrik – Ri-Bhoi, East Khasi Hills bad West Jaiñtia Hills kiba don ha syndah bad ka Wah Umkhen.
U la ong ruh ba kum ki rangbah kiba don ka jingsngewkhia halor katei ka jingthmu ka Sorkar, ki don ka jingsheptieng, kumba la pynpaw naduh kham mynshuwa ba ïoh ka Wah Umkhen, ka duh noh ïa ka jingitynnad jong ka shisien ka sngi.
U Bah Rngaid u la ong ba ka jingthmu jong ka jingïalang ka long ban ïa pyrkhat kumno yn leh haba ïadei bad katei ka bynta.
“Kiba ju pyndonkam ïa ka Umkhen ha ka rep ka riang, ka sum ka sait bad don ruh ki shnong kiba pyndonkam wat ban tan umdih sha ki ïing ki sem jong ki…ngi sngew ban pyrshah jur ïa kane ka jingthmu ka Sorkar,” u la ong.
“Kum ka dak ka jingpyrshah ban pynpaw sha ka Sorkar, ka Synjuk ha ka jingïalang ka la shim ïa ka rai ban pynlong da ka jingpynsngew paidbah ha ka 6 tarik Naitung ha jingkieng Umkhen kaba ha ka shnong Thadrang khnang ba ngi ki paidbah baroh ngin ïohi ïa ka jingitynnad jong ka Wah Umkhen bad ngim kwah ba kan duh noh shisien ka sngi,” la ong u President.
U la ong ruh ba ka Synjuk ka kwah ban pynneh-pynsah ïa katei ka wah, pateng-la-pateng, haduh ki longdien-mandien.
Ka Synjuk ka la rai ruh ban phah shithi sha ki Dorbar Shnong ba kin pyntip paidbah ba kine ki shnong kiba kynthup ïa ki 15 shnong kiba pyndonkam ïa ka Wah Umkhen, kin sngewbha ban ïa mih paidbah ha kato ka sngi (6 tarik) khnang ban ïoh pynpaw ïa ka sur kaba jam sha ka Sorkar ba na ka liang kiba pyndonkam ïa ka Umkhen, ki pyrshah jur ïoh ba kane ka wah ka kylla jaboh hadien habud.
Shuh shuh ka Synjuk ka kyrpad ïa ki nongsynshar shnong jong kitei 15 tylli ki Dorbar Shnong ban pynbna bad ïawer paidbah ban wan khnang sha ka jingpynsngew paidbah ha katei ka sngi.
“Ngi khot sngewbha ruh ïa ki kynhun seng bapher-bapher lem bad ki ‘riew rangbah kiba don ka jingsngewkhia ïa ka imlang-sahlang ne kiba ieid ïa ka mariang ba kin wan ban ïadonlang bad ngi ha kane ka sngi,” la ong utei u nongïalam.
Kum ban shu kdew hangne, ka rai jong ka Synjuk ban pynlong ïa katei ka jingpynsngew paidbah ka long namar ba ka Sorkar kam shym la sngap ïa ka jingdawa jong ka Synjuk wat la dep ban phah bun tylli ki jingthoh sha ki tnad treikam Sorkar haba ïadei bad kane ka bynta hynrei haduh mynta ka Sorkar kam shym la sngap ïa ka jingdawa jong ka Synjuk.
Kane ka jingpynsngew paidbah kan sdang naduh ka por 10 baje mynstep haduh 1 baje mynsngi.
