Shillong, Jylliew 30
Ka England ka la ïoh rung sha ka quarter-final jong ka lympung Euro 2024 hadien ba ka la lah ban pynliem noh ïa ka Slovakia ha ka jngïakhun pre quarter-final kaba la long ha ka janmiet jong ka Sngi U Blei.
Ka England ha kane ka jingïalehkai, ka la knieh noh ïa ka jingjop na ka kti jong ka Slovakia ha ka minit kaba khatduh shwa ban wai noh ka jingïalehkai.
Ka Slovakia ka la ïoh thep ïa ka kol ba nyngkong lyngba u I Schranz ha ka minit kaba 25 bad la i kumba ka Slovakia kan khur ïa ka jingjop namar wat hadien ki 90 minit ruh ka England kam shym la lah ban pynphai. Ka por ka don sa tang katto katne sekhon shwa ban put pynwai, u Jude Bellingham ha ka minit ba 90+5 u la ïoh ban pynïakhaid. Kumta ïa ka jingïalehkai la bteng biang sha ka extra time.
Haba bteng ïa ka jingïalehkai ha ka extra time, tang mar ïa sdang, u Harry Kane u la ïoh ban thep ïa ka kol kaba ar kaba la pynbuh bol da u Ivan Toney. Kane ka kol ka la biang pura na ka bynta ka England ban jop ïa kane ka jingïalehkai bad ban ïoh rung syndon sha ka quarter-final.
Hadien kane ka jingjop, ka England mynta kan pynkhreh pat ka jingïakhun ha ka quarter-final pyrshah ïa ka Switzerland ka ban long ha ka sngi Saitjaiñ ha Dusseldorf.
