Jowai, Jylliew 30
Ka lehniam Behdein-khlam kaba ju pynlong man u snem da ka Seiñraij Jowai ka la sdang ha ka 30 tarik Jylliew bad kan kut ha ka 3 tarik Naitung ha pung Aitnar.
Ka Behdeinkhlam ka dei ka lehniam ban beh krat ïa ka khlam ka ngoh na ka imlang-sahlang kaba lah ban wan ha ka dur jong ki jingpang, jingshitom, ki jingpynjot ka bor mariang bad kino-kino ki jingsniew ha ka imlang ka sahlang.
Mynta ka sngi ka dei ka sngi banyngkong jong ki “Soo sngi Le Ïaw” ha kaba ki “Khon Raij” na ka dong Chilliangraij ki la wanrah ïa ka Symbud Khnong na Riat-tu-rim ban pynpoi ha kjat Loomsooïung bad ban buh baroh shi miet.
Shuwa ba ki Khon Raij kin mih paidbah ha ryngkat ka Bom ka Ksing bad ka Tangmuri ban leit shaw ïa ka Symbud Khnong, la don ki jinglehniam bapher-bapher ba la pyndep naduh ka por 5 baje mynstep ha kaba u Chutia u la leit shim ïa u ‘Khoo Pyr-nah’ na ïing ka Wet (Paswet, Wah Synji), ka jinglehniam kaba ki khot ka ‘Siang ka Pha’ kaba mut ba ki aibam aidih ïa ki bahaïing kiba la khlad na kane ka sla pyrthei.
Ha ka por 6 baje pat la pyndep ïa ka “Bam Tyngkong” ha ïing ka Langdoh, katba ha ka por 8 baje mynmiet ka bynta ba khatduh jong kane ka sngi banyngkong jong ki ‘Soo sngi Le Ïaw’ ka long ka “Kdoh Sarang” ba la pyndep da u Sangot Paswet bad u Harna Muid ha ïing ka Langdoh.
Ki bynta jong ka sngi ba-ar jong ki ‘Soo sngi le Ïaw’, kata ha ka 1 tarik Naitung, ka long ka jingkñia Aitnar ka ban sdang naduh ka por 5 baje mynstep, katba ha ka por mynsngi pat ki dong kin leit shaw ïa ki Deiñkhlam na khlaw bad ban wanrah ïa ki sha Ïawmusiang.
