Tura, Jylliew 30
U nongïalam ka BJP bad MDC ka Tura, u Bernard N. Marak ha ka Sngi U Blei u la kam ba ka jubab ïa ka RTI kaba la pan haba ïadei bad ka jingkhyllem ka kynroh jong ka P.A. Sangma Stadium ka la shah kyntait ha ka shlem treikam u Deputy Commissioner, West Garo Hills.
“U PIO u la shu ai ka jubab ka bym shai ïa ka RTI da kaba ong, “ki jingkylli ki long ki bym shai”. Ka jingpan RTI halor ka kynroh ba shipor ha sawdong ka P.A. Sangma Stadium kaba la khyllem katto-katne taïew mynshuwa bad ka jingtip ba bniah jong ki projek kiba la pyntrei ha P.A. Sangma Stadium la kah dum da ka jingkuman jong u khlieh ka distrik, kaba pynkheiñ ïa ka aiñ RTI. U Public Information Officer (PIO) u shu jubab ïa ki jingkylli ha ka rukom ka bym shai. Lada u khlieh ka distrik u kyntait ban jubab ïa ka RTI, kaei shuh ngin khmih lynti na kiwei-kiwei ki tnad treikam ki bym shym la jubab ïa ki RTI ba la ujor ha ka 12 tarik u Rymphang?” la buh jingkylli u Bernard.
Katkum ka jingsngew u MDC ka Tura, ka jingtip ba la pan ha shuwa ka dei halor ki kaiphod ba bniah jong ki projek jong baroh ki projek kiba la pyntrei ha P.A. Sangma Stadium – ki jingtip ba bniah halor ka jingmang pisa da ka Sorkar Pdeng bad kaba la sei haduh mynta, ka jinglong-jingman jong man la kawei-pa-kawei ka projek bad ka tarik ban pyndep ïa ki, ka kaiphod jingtohkit bad ki kam ba la leh halor ka kynroh kaba la khyllem hashuwa, kumjuh ka DPR jong ka kynroh ba shi por kaba la khyllem bad mano ba la mang ïa ka jingpyntrei jong ka.
“Kam don ka jingkhuid bad ki bor distrik ki buhrieh ïa ki jingshisha wat ïa ki RTI, kaba long ka jingpynkheiñ ïa ka aiñ RTI,” kynnoh u Bernard, da kaba byrngem ba un sa pynsngew ïa kane sha ka Sorkar Pdeng bad kaei ka jingpynshitom kaba la leh katkum ka aiñ.
