Shillong, Naitung 01
Ka Sorkar Jylla ka la pynkhreh ïa ka jingtyrwa ban ïoh tei ïa ka jaka sumar ïa ki mrad (veterinary hospital) kaba nyngkong eh ha Jylla bad ïa kane ka projek yn pan pisa lyngba ka skhim Prime Minister’s Development Initiative for North East Region (PM-DevINE).
U Myntri ka tnat ri jingri u Bah AL Hek u la ong ba ka State level Empowered Committee ka la dep ban pynïaid shakhmat ïa kane bad mynta yn phah sha ka Sorkar Pdeng ban ai jingmynjur ban mang pisa lyngba ka PM-DevINE.
U la ong ba ka jaka jong ka tnat ri jingri ka la don lypa ha 7th Mer Upper Shillong kumba 20 akar bad donkam ban ïoh pisa kumba T.32 klur ban sdang ïa ka projek. Baroh ka jingdonkam pisa kan long kumba T.60 klur na ka bynta kane ka projek.
U Bah Hek u la ong ba ynda la don kane ka jaka sumar ïa ki mrad, kan long ka jingmyntoi namar ki paidbah kiba ri jingri kin ïoh ban phah sumar ïa ki jingri ha kane ka jaka sumar khamtam namarba mynta lei lei ki la nang bun ki briew kiba ieid ïa ki jingri.
Kumta u la ong ba ka Sorkar Jylla kan buddien bad ka Sorkar Pdeng ban pynurlong ïa kane ka jaka sumar kaba nyngkong eh ha ka Jylla.
