Shillong, Naitung 01
Ki klob I-League ki la byrngem ban kiew ïinglieh-ïingsaw lada ka synjuk ïalehkai jong ka All India Football Federation (AIFF) kim lah ban pyntreikam ïa ka kyndon ban pynhiar kyrdan ha ka Indian Super League naduh ka aïom ïalehkai 2024-25 kaba la long kumba la priud dak da ka AFC kaba la mynjur ha u snem 2019.
Kine ki klob ki la byrngem ruh ban weng noh ïalade na kane ka lympung lada ka AIFF ka dang ïai sngap mynthi halor kine ki jingdawa.
Kat kum ka shithi ba la phah ha ka Sngi Thohdieng, ki klob jong ka lympung ïalehkai I-League ki la pynkynmaw ïa u President ka AIFF u Kalyan Chaubey ba ki ar bnai ki la ïaid wat la u la kular ban shim khia ha ka jingïalang kaba la long ha ka 29 tarik u Jymmang.
Nalor ka jingdawa ban pyntreikam noh ïa ka kyndon ban pynhiar kyrdan ïa ki kynhun kiba wan shatrai ha ka ISL, ki dang don ki jingdawa kiba haduh mynta kim pat pyntreikam kum ka nongpynïaid ïew (broadcaster), ki tarik ïalehkai bad ba ka jingdon ka pisa hapoh ka synjuk, ïa kaba kiba bun ki klob I-League ki dangsah ha umdum.
Kumba ka paw ka jingkyntiew kyrdan ïa ki klob sha ka ISL ka la sdang naduh ka aïom ïalehkai 2023-24, bad ka Punjab FC ka la long ka klob kaba nyngkong eh hadien ba ka la ïoh ban rah ïa ka nam lahduh bad mynta ka kynti ka Mohammedan Sporting kan pynïasoh lang ha kane ka aïom ka ban wan bad kan shong kat kum ki kyndon kiba kane ka klob kan hap ban ïoh jingmynjur. Hynrei kaba dangsah mynta ka long ba ym pat shym la lah ban pyntreikam ïa ki kyndon ban pynhiar kyrdan ïa ki kynhun kiba wan shatrai ha ka ISL.
“Kane ka mat ka long kaba eh na ka bynta baroh ki klob, khamtam eh ha ka aïom ka ban wan ka ban sdang hapoh mynta u bnai da ka Durand Cup. Ngi la dawa ban ïohpdiang ïa ka shithi hapoh ka taïew halor ka jingdawa ban pyntreikam noh ïa ki kyndon pynhiar kyrdan naduh ka aïom ka ban wan, kaba long kumba la priud dak ha ka jingïalang ka AFC bad ka AIFF ha u snem 2010,” la pynpaw u President ka I-League Clubs Association u Ranjit Bajaj.
