Mynta u snem, ngi da sngewnguh shisha ba ka mei mariang ka la ai ha ngi ïa u slap uba la pyllait na ka jingrang tyrkhong bad ka jingduna umbam umdih. Da ka jingwan biang por jong u slap, ngi la lait na ka jingshit kyrang watla ka jingsngew lhop ka jur. Ngi la lait ruh na ka jingtyrkhong ki tyllong umbam umdih. Ha kajuh ka por, ngi ïohi ba ki surok ha kane ka jylla ki tlor kloi na kiba bun tylli ki daw bad kawei na kita ka dei ka jingjur palat jong u slap. Ki surok kim lah satia ban shan ha ka um. Ngi ïohi sha kiwei ruh ki nongbah bad ki sor jong ka Ri jong ka jingjulor jong ki surok haduh ba kin da pei thliew syndon.
Ynda la rang, kan dei ka kamram jong ka sorkar ba kan maramot ïa baroh ki surok kiba la jot rathai la ki dei ha sor ne ha nongkyndong. Kam mut ba tang shisien ba la dep ban shna, yn ym maramot shuh. Ka sorkar ka lah ban ong ba ka kyrduh pisa. Tangba ka dei ka jingkitkhlieh ka jong ka ban wad ïa ki lad ki lynti ban pynduna ïa ki jingeh jong ki paidbah naba ka dei ka sorkar hi kaba ong ba ki surok ki long kum u budlum jong ka ïoh ka kot bad khlem ki surok kiba bha, ki paidbah kin shem jingeh.
Dang katto katne bnai mynta, ka kaiphod u Comptroller & Auditor General ka la pyni ba 102 tylli ki projek jong ka tnat Public Works Department (PWD) ki la sahteng bad don ba ka jingsahteng ka long palat 10 snem eiei. Ngi ïohi ba ki surok, la ki dei ha sor ne ha nongkyndong, ki la jot lut bad kane ka wanrah ruh ïa ka dheng kali kaba jur. Ha ka jaka ba ki kali kin ïoh ïaid sted, kim banse ban kham ïaid suki noh namar ki thliew ki syar kiba bun. Kiba bun na ki nongñiah kim kwah ba ki kali jong ki kin shu kylla mar jot tang namar ki surok bad namarkata ki antad ha ka rukom ñiah ynda ki poi ha ki surok ba sniew.
Ka kam shna surok kam dei jong ki MLA ne ki MDC, ka dei jong ka tnat PWD (Roads & Bridges). Ki MLA, MDC ki lah ban shu leit ïasaid hakhmat u Myntri PWD lane ki heh jong kane ka tnat. Na ka skhim MLA ruh yn ym lah ban pyndap ban shna surok namar ka dei ka kam kaba remdor bha. Ngin khmih lynti aiu na ki MLA haba ka skhim ba ki ïoh ha ka shi snem ka long T. 2.5 klur. Tang haei yn ai surok na kane ka T. 2.5 klur? Ki bun kiba sngewthuh bakla ba ka dei ka kamram jong ki MLA, MDC ban shna surok. Lada ki pynlang ïa ka pisa T. 2.5 klur baroh san snem ruh, ka jingmih ka long tang T. 12.5 klur. Lehse tang ban maramot malu mala ïa kawei ka surok, ka la dap. Hynrei ha ki konstitwensi, ki bun bah ki shnong ki thaw kiba donkam surok. Yn ai tang ïano bad yn kyntait tang ïano.
Namarkata, ka PWD ka dei ban kham trei smat trei sting. Ngi tip ba ka dei kawei na ki tnat treikam ba bun bah ka pisa. Nalor ka pisa jong ka sorkar jylla, ka pisa na ka Sorkar Pdeng ruh ka wan ban pyntreikam ïa ki surok PMGSY. Ka sorkar kam dei ban kmen tang ba ïoh ïa ki projek ba heh kum ka jingshna ïa ki surok ‘two-lane’ lane ‘four-lane’. Kine ki projek heh ki wanrah shibun bah ka pisa kiba da ki spah bad hajar klur tyngka. Hynrei ki paidbah ki donkam ruh ïa ki surok ki barit na ka bynta ka jingdonkam ba man la ka sngi. Ka sorkar ka dei ban pynleit jingmut ruh ban shna pynbha ïa ki surok kiba la jot rathai haduh ba tang ban ïaid kali ruh ka la jynjar. Haba ki paidbah ki la siew khajna ka dei ka kamram jong ka PWD ban ai ïa ka jingshakri kaba bha tam bad ym dei ban shu ïa kmen toh hoh tang bad ki kontraktor heh spah.
Haba maramot ne shna surok, ym dei ba ka PWD ka leh ïa kano kano ka kam leh isynei. Kam ju don kum kata. Lada kam leh, ka mut ba ka PWD ka la kyntait noh ïa ka jingkitkhlieh kaba ka don. Lada hap ban ïa leit tynruh man la ka sngi bad kane ka tnat na ka bynta ki surok, ka mut ba ki karikor bad kiwei pat kiba trei ha kane ka tnat kim pyndep hok ïa la ka kamram. Lada ka tnat ka ai surok tang shaba mon da kaba wanrah ïa ka kam saiñpyrthei, la dei ban ïa leh eiei da kaba tyngeh khnang ba kan pynduh ïa ka jingmlien basniew ban leh shiliang khmat. Ka tnat PWD ka dei jong ki paidbah baroh bad ym jong kano kano ka seng saiñpyrthei. Kiba donkam surok kim dei tang kiba don ha ka seng kaba bat ïa ka jingsynshar.
