Shillong, Naitung 01
Ka jingther jong u ‘lapbah-‘lapsan naduh ka Sngi U Blei uba dang ïai bteng haduh ka Lah Sngi U Blei ka la wanrah ïa ka twa khyndew ha kylleng ki district jong ka jylla Megha-laya.
Kat haduh ba la pynmih ïa kane ka khubor, ka jingïoh lum ïa ki khubor kiba ïadei bad ki jingjia twa khyndew ha ki ar jaka, kata, ha ka shnong Tieh-saw ha surok Nongstoiñ-Shillong Highway ha kaba wat ki kali heh ruh kim lait shuh ban ïaid lyngba na kane ka surok. Ki nongtrei jong ka tnat PWD (Roads) tang shu ïoh jingtip halor kane, ki la phah da ka kali puhshilum ban khat ïa ka khyndew kaba la hap hapdeng surok khnang ban weng ïa ka jingdheng kali na ka daw ka jingtwa jong ka khyndew.
Sa kawei pat ka jingtwa khyndew ka la jia ha ka surok Lawbyrtun-Rngikseh kaba hap hapoh ka Mawthadraishan Community and Rural Developement Block, Eastern West Khasi Hills. Ka kynhun jong ki ophisar ka Block ki la leit ban pynlong ïa ka jingtohkit kaba bniah.
Ha ka jingther jong u ‘lapbah ka la wanrah sa ka jingtwa khyndew kaba shyrkhei hapoh ka shnong Umlieh, West Khasi Hills District ha ka step Lah Sngi U Blei.
Katkum ka jingïathuh u Sordar Shnong u Bah E.B Marngar, la ong ba ka jingtwa jong ka khyndew ka la jia ha ka por kumba 6.30 baje mynstep.
Ha kane ka jingtwa jong ka khyndew, kawei ka ïing dewbilat ka la shah tap ha ka khyndew bad ka surok Umlieh-Mawlangsu ka la shah khang lynti bad sahkut ka leit ka wan bad kumjuh kawei ka kali Maruti Van ruh ka la shah tap ha ka khyndew, hynrei ba ym shym la don mano-mano ba mynsaw namarba ha kane ka por ki briew kim pat don satia hapoh jong katei ka ïing ne ha ka kali.
Kane ka ïing ka dei jong u Bah Onisha Wahlang bad ka Kong Miansidaris Lyngkhoi, katba ka kali ka dei ka jong u Bah Derik Nongphud na ka shnong Umlieh.
Mynta ka kynti, ka jingther jong u ‘lapbah-‘lapsan, kawei ka trok ka la sahkut syndon hapdeng surok namar ka jingtwa jong ka khyndew hapdeng surok hajan ka Toll Gate kaba don ha ka shnong Lumshnong, Lad Bri Shyrnot, East Jaiñtia Hills District.
Ha ka dur-khih ba la ring da ki ‘riew paidbah ïa kaba la phah sha u nonglum khubor la sakhi ba ka surok ka la julor na ka daw ka jingtuid jong ka umktieh kaba la khang syndon ïa ka leit ka wan jong ki kali kiba ïaid lyngba na kane ka surok.
Ha rilum Garo, ka khyndew ka la twa ha ka bynta jong ka surok Ringrey-Gandrak-Chitoktak ha kaba ka kynhun State Disaster Response Force ka la leit ban pynkhuid ïa ka khyndew khnang ban pyllait ïa ki kali kiba la ngat ha ka dheng kali hapdeng surok.
Ha ka shnong Akkongre, ka jingtwa jong ka khyndew ka la khyñniat jubor ïa kawei ka kali sha khap surok bad ha kane ka jingjia kam shym la don kano-kano ka jingjia ba sngewsih.
Ha ka kyntoit Deran kaba don hajan ka shnong Chitoktak, Tura kawei ka ïing ka la shah pynjulor na ka jingtwa jong ka khyndew.
