Bah D. Pakyntein
Ha ka sngi bam smai, u Rangbah Dr. Ricky Syngkon, u deng da u tie rong blu. Kane ka rong, ka thaba haduh katta-katta, bad ka pynphuh-pynphieng, ïa ka dur khmat kaba shai bad kaba don ka jingkyrmen. Baroh ki MP, kiba don ha kato ka sngi, ki da kwah ban peit bha markhmat, ïa uta u MP bad ka Seng, kaba jop lut ïa ki bor baroh. Hooid; ka jylla Meghalaya, ka hiar shatrai bha ha baroh ki liang, hynrei ka long nyngkong pat ha ki jingïalap elekshon, shu lut tang ka bai umphniang kali, bad bai wai ïa ki tyndong pynsawa, rynsan ruh ym ju iohi, bym don pisa ban pynlut kai, lada slap, ïa-jhieh lang bad u paidbah ba shit-rhem. U Rangbah Saleng Sangma, ruh u iphuh-iphieng kumjuh, u sngewshngain ruh, ba dei na kajuh ka jylla.
Bun bah ki lama ba don ka rong blu. Ka lama jong ka United Nations ka dei ka rong blu, ka dak jong ka jingïatylli bad ka jingïasuk ka SBI ka pyndonkam da kane ka rong, ka pyni kumno ban kynshew, bad pynlut ban iohnong bun ki kali kit nongpang, ki thoh da ki dak bad pynthaba da ki lait rong blu, ka dak jong ka jingai jingsumar kaba kham kyrkieh ka rong blu, ka dei ruh ka dakban ïada ïa ka mariang bun ki ïingmane, ki jaka ïa jingsumar, bad ki skul, la ai da ka rong blu ka sad jong ka pyrthei, U Nongbuh-Nongthaw U ai da ka rong blu; hooid, ki stad saian ki lah ban batai da kumwei, kata ka dei ka kam ka jong ki. Shaei ka Synduk Ka Jutang, ka don, kaba U Blei, U lah mana ban peit bad ban ktah?
Ka lama ba don rong blu jong ka VPP, ka rong ba ai mynsiem, ka rong ka jingïasuk, ka rong ka jingtngen, ka rong jong ka jingïatip lem, ka rong ka jingkyrmen, ka rong jong ka jingstad-jingshemphang, ka rong ka bym shet kylla, bad kumta ter ter. Ha ka 8 tarik u bnai Jylliew, 2024, lah ïohi ïa ka rynsan rong blu, jong ka VPP, wat la ka rit ruh, ka pyndum ïa baroh ki rynsan ba phyrnai, ha ki por ïalap elekshon. Ki paidbah ba rah lama rong blu, ki tap lut ïa ka khyndew rong bthuh, bad ki phlang rong jyrngam ka madan Smit.
Ha ka Kitab Eksodos 24:10 – bad ki lah ïohi ïa U Blei ki Israel te la don hapoh ki sla jat jong u kumba la siang da u maw sapphir, bad kum ka met jong ki bneng ha ka jingphyrnai. U mawkordor sapphir u don ruh, ha kiwei ki rong, hynrei u rong blu u kam paw ha ki por hyndai, bad haduh mynta ruh. Kane ka kyrteng ka rong, ka paw bha ha ka Holy Bible, bad ka kyntien peh ruh lah thoh bunsien ha ka Baibl, Loukas 3:17- uba ka jingpeh jong u ha ka kti jong u; hynrei ïa u stait un thang da ka ding bymjulip.
Ki jingtynjuh, ban pynkhyllem, kim dei shuh kiba dang thymmai U Jisu Khrist, ruh u lah mad bunsien ïa ki jingtynjuh, hynrei U jop beit ïa ki. Ka don kawei jingtynjuh, kaba kham pher, ïa kaba ngi lah ban shem ha ka Gospel U Ioannis ka lynnong kaba 8. Hangne ngin shem ba ki nongthoh bad ki Pharisi, kiba ieh bad klet lut ïa ki kam ki jam kiba ki dei ban trei, step la bad miet, ki pyndonkam ïa ka khlieh ba khlem jabieng, kumno ban pynkhyllem, ïa U Nonghikai. Oh, ki lah wallam ïa ka briew kaba klim ki da ïa ong ruh ba kat kum ka hukum U Moses, lah dei ban lymthem maw, bad ki lah kylli ïa U Jisu, me te me ong kumno ? Ka lah dei ka jingkylli kaba eh bha ïa u briew ban jubab. Hynrei U Jisu u lah dem ha tbian, ban pyndem hakhmat U Blei, ban ioh ïa ka jubab kaba dei eh, bad ruh u lah thoh da ka shympriahkti ha ka khyndew, ym don ba tip u thoh aiu. Haba u la pynïeng ïalade, bad u ong ba uta uba khlem pop, to un lynthem nyngkong, bad baroh ki phet ïam rem haba ki iohsngew ïa ka jubah kaba tang shi lain; bad U Jisu u khlem pynrem ka ka.
Ha ka Kitab Deuteronomi 22 : 25-29 la thoh shaphang ka jingbatbor ïa ki kynthei.Ka long kaba sngew shyrkhei ban tip ba ka jingshah thombor ki kynthei-khynnah ka kiew katne-katne ha ka jylla jong ngi. Ko, phi ki kynthei-kynnah ba tang shi bor, 12 bor phin ioh na kane ka rong, bad ah, ki nongthombor, kynshew noh kloi, sanphew ki shekel rupa. Husiar bad to tipruh! “Ka ding rong blu ka khlaiñ ka khluit da ki spah shah ban ïa ka ding rong saw”
