Kharkiv, Naitung:
Ki bor pyniaid ka Ukraine ki la pyntip ba ha ka Sngi U Blei ki shipai ka Russia ki la thombor sha ka jaka ba shong ki riew paidbah ha kaba uwei u la khlad ha shne bad 9 ngut kiba mynsaw pat, kynthup ia i khyllung napdeng jong kitei kiba mynsaw.
U heh ka nongbah Kharkiv, u Oleg Synegubov u la pyntip ba itei i khyllung ba mynsaw ha katei ka jingjia dei i ba dang don tang 8 bnai.
Katba uwei pat uba khlad u dei u nongtrei jong ka ïing Dak kaba shah ther bom ha ka Russia ha katei ka sngi.
Namar la ong ba ka nongbah Kharkiv hi ka dei ka nongbah ba ka Russia ka phai khmat bad pynjur bha ia ka jingleit thombor naduh kaba sdang jong ka thma.
Kumjuh ruh la ong ba u President ka Russia- u Vldimir Putin u la krem lypa ba ka jingjur ka thma ha ka phang Shatei-mihngi ha Ukraine ka long ban iada ia ka bynta khappud jong ka ha Belgorod.
Shuh shuh ruh la ong ba ha ka Sngi Saitjaiñ jong kane ka taiew ba la dep, 7 ngut ki la khlad bad kumba 40 ngut pat kiba mynsaw na ka jingther bom ka Russia sha Vilniansk, kaba don markhap bad ka Zaporizhzhia.
