Cairo, Naitung:
Ki shipai Israel ha ka Sngi U Blei ki la leit rung shuh shuh sa sha ki bynta jong ka Shejaia kaba don shaphang Shatei jong ka nongbah Gaza. Kine shipai ki la leit ban rung ruh sha bynta ka thaiñ West bad shaphang pdeng jong ka Rafah, ha kaba 6 ngut ki nong Palestine ki la duh ei ia ka jingim ha katei ka jingleit ther bom bad hiar thma jong ki shipai Israel ha kitei ki bynta ba shong ki riew paidbah bad kaba la pyn julor ruh ia bun tylli ki iing briew ha kitei ki thaiñ ba shah hiar thma.
Namar la ong ba ki tup thma jong ka Israel ki la leit ban rung sha Shejaia naduh kine ki 4 sngi mynta bad la ong ba kitei kit up ki la ther bom sha kito ki jaka ba don ki iing briew, ha kaba ki paidbah kiba shong hapoh ki la shu shah ker-kut bad sahkut hapoh kitei ki iing kiba la twa bad julor bad kim ioh lad shuh wat tang ban leit phet rieh sha kiwei pat ki jaka kiba kham shngaiñ ruh.
Hynrei, u Myntri Rangbahduh ka Israel- u Benjamin Netanyahu u la ong ba ka Israel kan ialeh ban leit tur haduh ban da ioh ban pynlut syndon ia baroh ki dkhot jong ka Hamas kiba don ha man ki bynta bad ki kyndong- kynshrot jong ka Gaza Strip baroh kawei kumba ka Israel ka la dep smai bad kular naduh kaba sdang ba kan kput naka bynta ki mynsiem ba lui-lui kiba la shah pyniap bad shah rahbor dusmon ha kitei ki lehnoh naduh kaba sdang jong ka thma. Kumta, u Netanyahu u la ong ruh ba katba ka Israel kam pat poi sha katei ka thong ba ka buh, kan ym kynran dien ne sangeh noh ia ka thma da lei-lei ruh.
Dei ha katei ka sngi ba ki shipai ka Israel ki dang ther bom bad iakhun bad ki lehnoh ha ki bynta ba la ioh ban kurup da ka Israel ha West Bank, la ong ba 6 ngut ki paidbah nongshong shnong jong katei ka thaiñ ki la duh ei noh ia ka jingim namar ka jing julor bad jingtwa jong ki iing- ki sem kiba don ha katei ka thaiñ hapdeng ka jingiakhun ka Israel bad ka Hamas.
Haba iadei bad kane, tang hadien khyndiat kynta ba u Netanyahu u la kren ia katei sha ki paidbah, ka Hamas ruh ka la pyllait ia kawei ka video kba la pyni ia ka jingtrei shitom jong katei ka kynhun ban shna bad thaw ia ki tiar iakhun thma kiba shyrkhei bad ba kin iakhun ban iada ialade bad ban nym ailad ruh ia ka Israel ba kan ñion ia ki watla ki shipai ka Israel ki la ioh ban leit rung sha man ki bynta jong ka nongbah Gaza.
Wat la ia katei ka video ym pat shym la pyntikna da ki lad pathai khubor, hynrei la iohi ruh ia ki dkhot ka kynhun lehnoh Hamas kiba dang pynkhreh bad pynbit pynbiang ia kawei ka tup thma kaba shyrkhei bad ba khlaiñ bor katba ki dang pyn-ap ban ioh thombor ia ka Israel ynda ki la dep ban pynkhlaiñ bha ialade.
Bad kaba sngew shyrkhei ka long ba, ha kaba kut jong katei ka video lane ka phlim lyngkot ‘Short Film’ ki nongshna jong katei ka video kiba kam ialade bad ki long ki dkhot jong ka Hamas, ki la thoh ia ka jingthoh kaba ong ba ka Hamas ka dang pynkhreh ia kaba kham khraw ba kan iakhun tyngeh bad ka Israel ha kane ka sien.
Kumjuh ruh ha ka Sngi Saitjaiñ jong kane ka taiew ba la lah, la ong ba ki shpiai ka Israel ki la pyntip ba 2 ngut ki bor pahara ka Israel ki la kyllon iap ha ka jingiakhun bad ki lehnoh Hamas ha ka phang North jong ka Gaza.
