Jowai, Naitung 01
Mynta ka sngi Mulong kaba dei ka sngi ba-ar jong ka Shad Behdeiñkhlam, la pyndep ïa ka Kñia Aitnar ba la pynlut pynsep da u Dolloi ka Elaka Jowai Bah Puramon Kynjing.
Ïa kane ka Kñia Aitnar la pyndep naduh 5:30 mynstep, bad ha shwa ban mih leit Kñia, ki waheh wasian naduh u Dolloi, u Pator, ki Langdoh ha ryngkat ki sangot, ki maji bad kiwei kiwei ki shakri niam ki la ïakynduh lang ha Iung Langdoh.
Ka Kñia Aitnar ka dei kaba kyrpang tam bad katkum ka hukum Niam, ki Phra Dong lane ki Kmai Raij kim bit ban leit shaw ïa ka Deiñkhlam na khlaw katba ym pat ban dep Kñia Aitnar.
Ha shwa ba ki Kmai Raij kin leit rah ïa ki Deiñkhlam jong ki na khlaw, ha ka por 11 baje mynstep, baroh ki shnong na Kmai Raij ki ïakynduh lang ha Mynkoipyrdi.
Katba ha ka por 3 baje janmiet, baroh ki Kmai Raij naduh ka Panaliar, Dulong, Loompyrdi ïongpiah, Loomïongkjam, Tpep Pale, Loomkyrwiang ki la wanrah ïa la ki Deiñkhlam na khlaw ban pynpoi ïa ki ha Iawmusiang.
Hadien pat ki Kmai Raij ki leit shaw ïa ki Khon Raij na jaka ba pynshongthait ïa ka Khnong Blai ban pynpoi ïa ka ‘Khnong Blai’ ha Loom Soo ïung bad hadien pat ki Kmai Raij kin leit phai ryngkat na kajuh ka lynti.
