Mawkyrwat, Naitung 01
Ka Southern Border Sports Association ka la pynhap pyrda noh ïa ka lympung 1st Invitation Football Tour-nament 2024 ha madan Panchiring, Ranikor Block South West Khasi Hills ha kaba ka Domsohkhai SC ka la rah ïa ka nam lahduh.
Kane ka nam jop ka la wan hadien ba ka la lah pynliem noh ïa ka Nongkdait Nongtwah SC lyngba ka tie-breaker da 9-8 kol.
Haba phai sha kane jingïakhun final kaba la long ha ka 29 tarik u Jylliew, ka long kaba shongshit bha ha kaba la sakhi lang da ki hajar ngut ki paidbah. Kane ka jingïalehkai ka long kaba ïakhaid bha hadpeng kine kynhun bad haduh kaba kut ka jingïalehkai ki la ïakhaid mar 2-2 kol.
Dei ha ka jingshut tie-breaker ba ka Dom Sohkhai SC ka la ïoh ban thep haduh 9 kol, katba ka Nongkdait Nongtwah SC ka la thep 8 kol.
Lyngba kane ka nam jop ka Domsohkhai SC ka la ïohpdiang ïa ka song pisa kaba T. 1 lak tyngka ryngkat ki trophy ba la sam da u Myntri ka tnat Social Welfare u Bah Kyrmen Shylla ha ryngkat ka jingïadonlang jong u MLA & MDC ka Ranikor Constituency Bah Pius Marweiñ, u District Sports Officer (DSO) ka SWKHD u Bah Daman Syngkon bad kiwei kiwei.
Kum ban shu kdew ka jingpynlong ka Southern Border Sports Association ïa katei ka lympung kalong kum shi bynta ban kyntiew ïa ki samla ka dong thaiñ ha ka kam ïalehkai phutbol.
