Shillong, Naitung 01
Ka kynhun tohkit ba la thaw da ka tnat Housing ban tohkit halor ka jingkynnoh sam tin sop ïing da kiba stang, kan sdang ïa ka jinghiar leit jurip bad tohkit naduh ka Sngi Ba-ar ban pynshisha ïa ka jinglong jong ki tin sop ïing.
Kane ka kynhun tohkit (inquiry team) kan hiar sha 7 tylli ki District jong ka rilum Khasi bad Jaiñtia bad ka jingsdang kan long shwa na ka kudam ha Nongmensong ha East Khasi Hills ha ka Sngi Ba-ar ka 2 tarik u Naitung.
Ka jingthaw ïa kane ka kynhun tohkit bad ka jinghiar ban leit tohkit ïa ki tin sop ïing ka la long hadien ka jingujor bad kynnoh jong ka Hynñiewtrep Youths’ Council (HYC) ba ka la don ka jingsam ïa ki tin sop ïing kiba stang hapoh ka Chief Minister Housing Assistance Programme (CMHAP).
Ka kynhun tohkit kaba khlieh da u Joint Secretary ka tnat Housing u LC Marak, kan leit jurip ïa ki kudam jong ki Community & Rural Development (C&RD) Block ha East Khasi Hills naduh ka 2 tarik Naitung haduh ka 9 tarik, West Jaiñtia Hills ha ka 12 tarik Naitung, Ri-Bhoi ha ka 13 tarik Naitung, Eastern West Khasi Hills bad West Khasi Hills ha ka 16 tarik Naitung, East Jaiñtia Hills ha ka 19 tarik Naitung bad South West Khasi Hills ha ka 20 tarik Naitung.
U LC Marak ha ka shithi ba 28 tarik Jylliew, u la bthah ïa baroh ki District Housing Officers (DHO) bad ki Block Development Officers (BDO) ba kin ïadon ha la ki jong ki shlem treikam ha ka sngi ba wan jurip ka kynhun tohkit ban pynshisha haba ïadei bad ka jingkynnoh sam tin sop ïing ba stang kumba kynnoh da ka seng.
Lah ban kdew hangne, ïa kane ka tin sop ïing la shalan da ka kompeni Hariana Iron Works Pvt Ltd, Kolkata, West Bengal bad la pynpoi ïa kine ki tin sha baroh ki District bad ki Block jong ka Jylla.
