Shillong, Naitung 01
U MLA ka Nongpoh, Bah Mayralborn Syiem ha ka Lah Sngi U Blei u la leit ban ïakynduh ïa u Myntri Rangbah ka Jylla u Conrad K Sangma ban buddien ïa ka kam kaba ïadei bad ka jingshna pynbha ïa ka surok Nongpoh-Umden-Sonapur.
Ha kane ka jingleit ïakynduh ïa u Myntri Rangbah, u MLA u la ïoh ban aiti ruh ïa ka shithi ym tang ban wad bniah halor ka kam ba ïadei bad ka surok hynrei ruh ban kyrpad ïa u Conrad ba un kynthup bad buh hakhmat eh ïa katei ka surok na ka bynta ban pynmang pisa ban ïoh pyntrei noh.
Haba kren sha ki lad pathai khubor, u Bah Mayralborn u la pyntip ba um shym la shong kli-kti hynrei u la shimkhia bha ban buddien bad ka kam ba ïadei halor ka jingdawa ban pynbha bad maramot noh ïa ka surok Nongpoh-Umden-Sonapur.
U la pyntip ba kane ka kam ka la ïaid shaid-shaid shakhmat bad don ka jingkyrmen skhem ba ïa ka kam yn sa lah ban sdang noh ha kane hi ka snem ba mynta. U la ong ruh ba ka jingïakynduh ïa u Myntri Rangbah ka long ban kyrpad ban pynthikna ban pynkloi noh ïa kane ka kam.
U Bah Mayralborn u la ong ba ka jingpynbha bad maramot kan long ha ki ar bynta, bad ka bynta ba nyngkong kan dei ka surok na Nongpoh haduh Umden kaba jrong 20 kilometer, kaba hap hapoh ka NESIDS bad ka ban bei pisa da ka Ministry of DoNER jong ka Sorkar Kmie ha ka jingmang pisa kaba la buh 52.98 klur tam.
“Ha kane ka jingïakynduh, nga la kyrpad ïa u Myntri Rangbah ban pynkloi ïa kane ka kam bad ruh ban buh hakhmat eh ïa kane ka surok kaba donkam bha ban pynrung ha ka tnat Planning sha ka NEC,” la ong u MLA.
Haba kylli, u Bah Mayralborn u la ong, “Ka jingïakynduh ka long kaba seisoh, ha kaba u Myntri Rangbah u la kular ba kane ka surok kan long kawei na ki kam ba buh hakhmat eh, bad ban shimkhia na ka bynta ka jingmyntoi ki paidbah.”
