Shillong, Naitung 01
Kat man ba jur slap bad jur lyer, ki dieng ki ju khyllem bad don ba ki tnat dieng ki kdiah ha kaba ki waïar ilektrik ki julor bad poi sha u pud ban thut ka jingsam bording ilektrik ha kylleng ka Jylla.
Man ka por ka ju mih ka jingkhñium ïa ka Meghalaya Energy Cor-poration Limited (MeE-CL) bad shah kynthoh haba slem ban maramot bad pynïoh biang ïa ka jingsam ilektrik.
Ki briew ka MeECL ki ju bunkam ar shah lai shah haba jia ka jing-khyllem ki dieng kiba ban ïa ki waïar ilektrik, post ilektrik ne transformer namar ki dei maki kiba pom ïa ki dieng kiba khyllem ha ka por ba maramot ïa ka jingsam bording ilektrik.
Ki briew ka MeECL ki kubur ba ka kam ka khia shisha ïa ki haba khyllem ki dieng namar nalor ba ki trei ban maramot ban pynbha biang ïa ka jingsam bording ilektrik, ki hap bunkam sa ban ot bad khyndat ïa ki dieng kiba khyllem.
Ki la ong ba lada ym dei ba khyllem ki dieng, ki briew ka MeECL kim da bunkam than namar lada dei tang ba shu pynbha beit ïa ka jingsam bording kan nym shim por eh.
Ki la ai nuksa ba lada ka bording ka thut tang namar ka jingtied pyrthat bad ‘leilieh, kan nym da ktah eh ïa ka MeECL ban maramot, hynrei haba khyllem ki dieng, ka kham bunkam shuh shuh namar hap pom ïa ki dieng kiba khyllem bad hap maramot ïa ki post ilektrik bad waïar ilektrik.
Ka tnat khlaw ka dei ka tnat kaba peit ïa ki dieng ki siej bad ka jingkylli ka long, hato ka tnat khlaw kan pom lypa noh ïa ki dieng kiba buh jingma khamtam kiba lah ban khyllem ha kano-kano ka por?
