Shillong, Naitung 01
U MP ka Voice of the People Party (VPP) na Shillong Parliamentary konstitwensi, u Dr. Ricky A.J. Syngkon haba ai jingkren hapoh ïingdorbar Parliament ha ka Lah Sngi U Blei u la ban jur ïa ka Sorkar Pdeng bad ki dkhot ka liang pyrshah ban ai ka jingkyrshan na bynta ban pynrung ïa ka Ktien Khasi ha ka Khyrnit ba 8 jong ka Riti Synshar ka Ri.
U Dr. Syngkon haba kyrpad ïa ka Sorkar Pdeng bad ki dkhot jong ka ïingdorbar ban kyntiew ïa ka lariti jong ki Khasi, u la ong ba haba kren shaphang ka lariti, ka ktien ka thylliej ka long ka bynta ba kongsan eh.
“La bun-bun snem, ngi la dawa na bynta ka jingpynrung ïa ka ktien Khasi hapoh ka Khyrnit ba 8. Nga kyrmen ba lyngba ka jingkyrshan ki dkhot ba shisien ka sngi…kumba nga shong hangne naduh ka sngi banyngkong haba nga sngap ïa ki paralok kiba kren ha ka ktien lajong, katno nga kyrmen ba shisien ka sngi bad shen ba phi ruh phin ïohsngew ïa ka ktien kaba nga kren…ka ktien Khasi,” la ong u MP.
Ha kajuh ka por u pynpaw ka jingkyrmen ba ka Sorkar Pdeng, ki dkhot ka liang pyrshah, kin kyrshan ïa ka jingpynrung ïa ka ktien Khasi ha ka Khyrnit ba 8.
Halor ka jingkren ka President ka ri, ka Droupadi Murmu, u Dr. Syngkon la ong ba u la shah shkor bha ba shano bad ha kano ka rukom ka Sorkar kan ïalam ïa ka ri, hynrei u la sngewsih naba um shym da ïoh eiei than eh lait noh halor ki kam seisoh kaba ka Sorkar ka la leh ha ki snem ba la dep.
“Nga kyrmen ba ka Sorkar kan long shai ha ka jingpyrshang jong ka,” u la ong.
Haba kren shaphang ka suk ka saiñ hapoh ka Thaiñ Shatei Lam Mihngi, u MP u la ong, “Nga kwah ban pynkynmaw ïa ka Sorkar ba mynta bad ka Sorkar ba hashuwa hapoh ka jingïalam ka Congress ba ki briew jong ngi, ki briew jong nga kiba sah khamtam ha ki khappud bad ka Assam bad Bangladesh…nga pynsngew sha phi ba haduh mynta kim don ka jingshngaiñ.”
“Ki don ka jingsheptieng bad kaei kaba sngewsih ka long ba ki la shah knieh noh ka jaka puta bad duh noh ka lad kamai namar ka jingbym larkam jong ki Sorkar kawei hadien kawei ban pynbeit ïa kane ka jingïakajia kaba la don la bun-bun snem,” u la ong.
Haba kdew ba kumno yn kren shaphang ka roi ka par haba ki briew haduh mynta ki angnud ïa ka shong suk shong shngaiñ, u MP u la kyrpad ïa ka Sorkar ban shimkhia ïa kane ka kam bad kyrmen ba u Myntri Rangbahduh da lade un lamkhmat ha ka ban pynkut noh ïa kane ka mat ba sahteng.
Na ka liang u Dr. Syngkon u la kyrpad ruh ïa ka Sorkar bad ka tnad ba dei khmih ka Sorkar Pdeng ban noh jingïarap sha ka kad liengsuiñ hapoh ka Jylla khnang ba kan lah ban pdiang ïa ki liengsuiñ kiba heh.
Shuh shuh u la bynrap, “Haba rai halor ka mat treikam kum ka CUET, NEET na bynta ki samla, kaei kaba nga kwah pynpaw ka long ba hashuwa ngi mih shakhmat bad kine ki mat treikam, nga sngew ba ka long kaba donkam ban biang ki jaka thoh eksam.”
