Itanagar, Naitung:
Ki skul kiba don ha kylleng ki bynta jong ka Arunachal Pradesh kin sa khang khyrdep na ka bynta san sngi namar ka jingjur jong ka jingshlei um bad twa khyndew namar ka jingïai bteng jong ka jinghap slap ha kiba bun ki thaiñ kiba don ha Itanagar, naduh ka 2 tarik, Naitung haduh ka 6 tarik, Naitung.
Kumba la phah hukum, ka District Magistrate-cum-Deputy Commissioner cum-Chairman, District Disaster Management Authority, Shweta Nagarkoti, IAS ka la hukum ïa baroh ki skul kiba kynthup ïa ki Primary, Pre-Primary, Upper Primary, High Schools bad Higher Secondary Schools hapoh Itanagar ba kin khang na ka bynta san sngi kata naduh mynta ka sngi ka 2 tarik, Naitung haduh ka 6 tarik, Naitung.
Kane ka rai ka long naba la ïohi ba ka buh jingma ïa ka jingim jong ki briew khamtam ïa ki khynnah skul ba kin mih ha kum kane ka por ba ka jinghap slap ka dang jur bad ki jingap jingma na ki jingktah jong ki jingthombor ki bor ka mariang. Shi bynta ban ïada bad buh jingshngaiñ ïa baroh, la rai ban khang shwa ïa ki skul ha kine ki sngi ba la buh.
