Nongstoiñ, Naitung 01
Ha ka Lah Sngi U Blei jong ka taïew, ka tnat Pulit jong ka Meghalaya ka la ïoh biang sa 193 ngut ki pulit constable bad 18 ngut ki follower kiba dang pyndep ïa ka jingshah hikai ha ka jaka ai jinghikai kaba don ha 4th Bn MLP Sohpian.
Ïa kane ka jingpyndep shah hikai la ïohi na ka Passing Out Parade jong ka Batch kaba 8 Recruits Constable kaba la pynlong ha katei ka jaka ai jinghikai ha 4th Bn MLP (2nd IR) APTC Sohpian ha West Khasi Hills District.
Ha kane ka sngi ka Kong I Nongrang, IPS kaba long ka DGP ka Meghalaya ka la ïadon lang kum ka kongsan bad shim ruh ïa ka bynta ban ai khublei ïa ki 211 ngut ki pulit ba la pyndep ïa ka jingshah hikai.
Ha katei ka sngi la sam ruh ïa ka khusnam sha 13 ngut ki pulit kiba tbit tam ha katei ka jingshah pyntbit kiba kynthup ïa 10 ngut ki pulit constable bad 3 ngut Recruit Followers.
Kine 10 ngut ki pulit constable ki kynthup ïa u Best Trainee ha ka Drill ïa kaba la ïoh da u Dajoplin Nonglang, Best Discipline u Skolone Dkhar, Best Trainee in turn out la ïoh da u Ballit T Sangma, Best Trainee in firing la ïoh da u Riboklang Lyngdoh, Best trainee in physical training la ïoh da u Maiphersonroy Hoojon.
Nangta, ha ka Best Trainee in weapons handling la ïoh da u Prodium Rabha, Best Trainee in endurance la ïoh da u Shiningstar Marwein, Best Trainee in outdoor la ïoh da u Prizer R Marak, Best Trainee in indoor la ïoh da u Wanteilang Kharkongor bad ha ka All rounder best Trainee la ïoh da u Kyntiewbiang Kharhujon.
Katba, ki lai ngut ki pulit followers (recruit constable) ki kynthup ïa u Albert Manih u la ïoh ban khur ïa ka nam best follower in Drill, Best followers in Discipline u Chasang N Marak bad u Koribha Pala uba la ïoh ïa ka nam All rounder best followers.
Ha katei ka sngi la ïadonlang ruh u Commandant ka 4th Bn MLP Sohpian u Bah Lakador Syiem IPS, u Superintendent of Police ka WKH u Bikram D Marak MPS, ki heh pulit ka jylla, ki bahaïing hasem jong ki pulit kiba la pyndep ïa ka jingshah hikai bad kiwei kiwei.
Ka DGP ka Kong I Nongrang, IPS haba kren kum ka kongsan ha kane ka sngi kala ong, kane ka sngi kala pynkynmaw biang ïa ka sha ki 31 snem mynshwa ha ka por passing out jong ka, ha kaba ka mariang kala pynthut kat haduh ban hap leh noh ïa ka passing out parade hapoh Auditorium bad kala ai jingïaroh ruh ïa ki Recruit Constable kiba la shim ïa ka rai ban ïaid beit sha khmat ïa ka passing out parade ha kane ka sngi ha Sohpian long katba long.
Ka Kong Nongrang kala ong ruh ba kane ka sngi ka dei ruh ka nuksa na ka bynta jong ki namar kila long ki dkhot ba pura jong ka Meghalaya Police kumta kin don shibun kiei kiei ba kin sa ïakynduh ha ka jingtreikam ka jong ki hynrei kin hap pyndep beit ïa la ka kamram katba jia katba long.
Shuh shuh ka la ïaroh ruh ïa ki Recruit constable ba ym tang ba ki la shah hikai hynrei ki la noh synñiang ruh sha ka headquarter jong ka 4th MLP Battalion lyngba shibun ki kam ba ki la leh ki bym don bynta ha ka kam shah pyntbit pulit ka jong ki.
Ka DGP ka la kular ruh ba kan sa kren sha ka sorkar na ka bynta ban pynkloi noh ha kaba ïadei bad ka jingïoh jingithuh ïa ka training institute kane ka APTC ha Sohpian kaba la lah ban pynpass haduh 8 tylli ki Batch.
“Nga kwah ba phin kynmaw, ba haba phi long ki dkhot jong kano kano ka tnat bad phi phong ïa ki uniform ka dei ka jingkhot bad kam dei tang ka kam, ka dei kaei kaei kaba ba phi dei ban tikna ba phin aiti met bad mynsiem sha ka kam,” la ong ka Kong Nongrang.
