Shillong, Naitung 01
Ki paidbah ka jylla na ki katto-katne ki shnong kiba don ha sor Shillong ki la pynpaw ka jingsngewkmen shi katdei eh ban ïohi ba ïa ka skhim um JJM ne ka Jal Jeevan Mission ka la nang ïaid shaid-shaid ban pyntreikam da ka jingshimkhia jong ki bor kiba halor na ka tnad PHE. Ïa kane ka skhim ruh la sngewthuh ba kan ai jingïarap ïa shibun tylli ki longïing-longsem khamtam ïa u duk u suk ha ki shnong ki thaw bad ki jaka bapher-bapher.
Ha kawei ka liang ka la wanrah pat ïa ka jingsngewsih namar ïa ki jingtih bad jingjot ha lynti-syngkien ban pynïaid ïa ki pipe um na nala jong ki shnong ym maramot shuh.
Kitei ki paidbah ki la ong kaba sngewsih khyndiat ka long ba hadien ba la dep pyntrei ïa kane ka skhim, la ïohi ba la shu tap malu-mala tang da u khyndew ne maw khlem da pynbha pat ïa ka kumba ka ju long,bad haduh kat mynta mynne kam shym don satia kano-kano ka jingpynbha pat ïa ka.
Kumta halor kane ka bynta, na ka lang kiba bun ki paidbah kiba shah ktah ha kane ka jingpynjulor ïa ka surok da ka tnad PHE, ki kwah ban buh jingkylli ïa ka daw kaba la pynlong ïa kiba dei khmih ba kin shu ieh shrah ïa ka surok tang ban shu ïoh jingshai halor katei ka bynta.
Shuh shuh ruh kitei ki paidbah ki la ong ba kum ki shnong ki thaw ki la shah da ka mon sngewbha ban tih ïa ka jingpyntreikam na ka bynta kane ka skhim wat la ka long na ki lynti shnong ne ki jaka jong ki ‘riew paidbah halor ka jingpyrkhat ïa ka bha ka miat jong kiba bun balang, hynrei hadien ba la dep ban pyntrei ïa ka la shu iehnoh kumto khlem da maramot ne pynbha shuh ïa ka.
Kitei ki nongshong shnong ki la ong ba ka skhim MGNREGA (Mahatma Gandhi National Rural Employment Guarantee Act) lane ka jingtrei 100 sngi ka la pynbhabriew ïa kiba bun ki shnong kum ki nala um, ki lynti ïaid kjat, bad kiwei-kiwei da ka jingpeit jingkhmih jong ki bor shnong, ban pynlong ïa kiba bun ki longïing-longsem ban ïohkam-ïohjam bad ban ïoh jingmyntoi hynrei kaba sngewsih pat ka long ba ka don ka jingpynjulor khyndiat namar ban tih ïa ki thliew pipe jong ka JJM.
“Kumta ki bor shnong ki la hap ban shah da ka jingkyrmen ba yn sa pynbha pat ïa ka ynda ki la dep trei, hynrei haduh mynta ym don eiei halor katei ka bynta ban pynbha lane ban maramot pat ïa ka, na ka liang kiba bun ki sah ha ka lyngngoh bad buh ïa u dak jingkylli hato mano pat ban pynbha ïa ka khnang ban ym mih ka jingjot namar katei ka skhim?”, la pynkut kitei ki paidbah.
