Shillong, Naitung 01
Ka Umrynjah SC ka la pynjem khnap ïa ka Mawreng SC haduh shiteng dorjon (6-0 kol) ha ka lympung ïalehkai Under-20 Fourth Division ba la pynïaid da ka Shillong Sports Association (SSA) ha ka Lah Sngi U Blei ha madan Third Ground, Polo.
Ha kane ka jingïakhun jong ka Group-A, ka Wanborlang L. Nongbri bad u Damiatlang Rumnong ki la thep mar ar kol. U Wanborlang u la ïoh ban thep ha ka minit kaba 11 & 51, katba u Damiatlang ha ka minit ba 20 & 23. Katba ïa ki shi kol la thep da u Jeremaiah Rani (26) bad u Bashemphang Nongkhlaw (58).
Kumta ka Mawreng ka la mad ïa ka jingshah rem ar sien bad ha ka jingïalehkai ba nyngkong ka la shah rem da 8-1 kol ha ka Thynroit SC.
Haba phai sha ka jingïakhun jong ka Group-F kaba la long kham hashwa hapdeng ka Lummawbah SC bad ka Mawkasiang SC ha ki la ïasam mar shi point hadien ba ki la ïakhaid mar 1-1 kol ha SSA Stadium kaba ha 1st Ground, Polo.
Ka Mawkasiang ka la pynkhih jar nyngkong lyngba u Donald Suting ha ka minit kaba 17, hynrei u Andreve Maring u la ban pynïakhaid kylla na ka bynta ka Lummawbah ha ka minit kaba 58.
Ha ka sngi Ba-ar ka jingïakhun kaba nyngkong kan long hapdeng ka Umiew Maw U Sam pyrshah ïa ka New Challenger SC (1:45PM) ha First Ground, kumjuh ka Nongthymmai Raitnongkynrih SC ïa ka Mawlynrei SC (4PM) ha First Ground, katba ka Mawnianglah Youth SC ïa ka Mawpdang SC ha madan Third Ground, Polo.
