Guwahati, Naitung:
Ka jingïai bteng jong ka jinghap slap jur ha kiba bun ki thaiñ jong ka Margherita Sub-Division ha Tinsukia distrik ka la pynshlei um ïa kiba bun ki jaka.
Kumba la sakhi, la ong ba wat haba kane ka thaiñ ka la ïakynduh ïa kane ka jingeh ha katei ka por, u MLA jong ka Margherita u Bhaskar Sharma, u Margherita Sub-divisional Officer (civil), bad ki heh sorkar kim pat leit jurip ïa ki jaka ba ngat ha ka jinshlei um.
Ha ka Lah Sngi U Blei ka kynhun jong ki khynnah pule, kynthup ka Satra Mukti Sangram Samity Central Committee President Pappu Dutta bad u General Secretary barim jong ka Assam Tea Tribes Student Association (ATTSA) Margherita branch committee u Nuwel Patra, ha ryngkat ki nongthoh khubor ka thaiñ, ki la leit sha ka skul Khagoripathar Primary School kaba don ha kane ka thaiñ ha kaba kane ka skul kaba don ha Bhittorpowai Gaon Panchayat jong ka 83-number Margherita Constituency, ka la ai jaka sah bad jaka rieh ïa ki briew kiba la shah ktah jur na ka jingshlei um.
Kane ka kynhun ka la ai ki lad jingïarap sha ki lanot shlei um bad kumjuh ka la sam ruh ïa ki jingbam bad ki jingdonkam ba man ka sngi sha kine ki briew kiba pynlong jaka sah shipor ha kane ka skul.
Ha kane ka sngi, u Pappu Dutta u la kynthoh jur halor ka jingbym don ki nongïalam ka thaiñ ha katei ka por ba ki briew ki dang ïakynduh jingeh, ha kaba u la ong, “Ka long ka bym sngewlah ban ngeit ba u MLA jong ka Margherita u Bhaskar Sharma bad u Margherita sub-Divisional Officer (civil) kim don por ban leit jurip ïa ka shnong Khagoripathar ha ka por ba ki nongshong shnong ki la mad jingeh na ka jingshlei um.”
