Nongstoiñ, Naitung 01
Ka jingtwa khyndew kaba jur bha ka la jia ha ka step jong ka Lah Sngi U Blei ha kawei na ki bynta ha ka shnong Umlieh ha West Khasi Hills District hadien ba u slap ba jur u la neh mynta la katto katne sngi.
U Sordar ka shnong Umlieh u Bah EB Marngar u la ïathuh ba katei ka jingjia ka la jia ha ka por 6.30 mynstep jong ka Sngi Nyngkong, ha kaba kane ka jingtwa jong ka khyndew kaba la taplup ïa ka surok Umlieh-Mawlangsu, ka la wanrah ïa ka jingsahkut jong ka ïaid ka ïeng.
Ha kane ka jingtwa khyndew, kawei ka ïing dewbilat kaba shi mala kaba dang pyndonkam ban shong dukan bad kawei ka kali Maruti Van ki la shah taplup. Ha kane ka jingjia ym shym la don mano-mano ba mynsaw namar ha katei ka por ki briew kim shym la don satia hapoh ïing.
Katei ka ïing ka dei jong u Bah Onisha Wahlang bad Kong Miansidaris Lyngkhoi, katba katei ka kali kaba la shah taplup ka dei jong u Bah Derik Nongphud na ka shnong Umlieh.
Shuh shuh nalor katei ka ïing bad ka kali, ki la don ruh ki katto katne tylli ki ïing kiba don marjan ki la shah tap khyndew malu mala.
Halor kane ka jingjia, u MLA ka Nongstoiñ u Bah Gabriel Wahlang mar ïa ïoh jingtip mar mar u la hiar sha katei ka jaka ban pynlong ïa ka jingjurip.
Shuh shuh halor kane ka jingtwa khyndew ka tnat PWD Nongstoiñ ruh mar ïa ïoh ïa ka jingtip, ka la shimkhia bad phah ruh ïa ki kor puh shilum ban phah pynkhuid noh ïa ka khyndew kaba la twa bad tap lup hapdeng surok.
